Տեղեկատվական կենտրոն
Նորություններ
Արմավիրի մարզում շարունակվում են Հայոց մեծ եղեռնի ոգեկոչման միջոցառումները
21.04.2015
ՀՀ Արմավիրի մարզպետ Աշոտ Ղահրամանյանը և փոխմարզպետ Մովսես Քարտաշյանն այսօր Մեծամոր, Հայկաշեն և Գայ համայնքներում մասնակցեցին Հայոց ցեղասպանության 100-րդ տարելիցին նվիրված խաչքարի և հուշակոթողների բացմանը և ծաղիկներ խոնարհեցին մեկուկես միլիոն անմեղ զոհերի հիշատակին:
Արմավիրի հոգևոր թեմի առաջնորդ Տեր Սիոն եպիսկոպոս Ադամյանն օծեց Հայոց մեծ եղեռնի անմեղ զոհերի հիշատակին նվիրված հուշարձանները և աղոթք հնչեցրեց առ Աստված` Ցեղասպանության նահատակների հոգիների հանգստության համար:
Նշված համայնքներում Հայոց մեծ եղեռնի անմեղ զոհերի հիշատակը հավերժացնող քարե վկաները կանգնեցվել են համայնքապետարանների կողմից և խորհրդանշում են հայ ազգի անցյալը, ներկան և հավատը ապագայի հանդեպ:
Մարզպետ Աշոտ Ղահրամանյանն իր խոսքում կարևորեց համայնքներում Հայոց մեծ եղեռնի ոգեկոչման միջոցառումների իրականացումը, որը, ըստ նրա, ոչ միայն արտահայտում է Հայոց հարցի միջազգային դատապարտմանն ուղղված միասնական պայքարը, այլ նաև հայրենասիրական կարևոր դաս է մատաղ սերնդի համար. <<Մեր երկրի վաղվա կերտողները տեսնում են, որ ավագ սերունդը պահանջատեր է, և չի մոռանում ու պահանջում է արդար հատուցում մեկուկես միլիոն անմեղ հայերի արյան համար>>:
Մարզպետը բարձր գնահատեց Հայոց ցեղասպանության ճանաչման հարցում Հանրապետության նախագահի և իշխանությունների ներդրումը: Նա ընդգծեց, որ այդ ամենի արդյունքում էր նաև, որ Հռոմի կաթոլիկ եկեղեցու հովվապետը Սուրբ Պետրոսի տաճարում պատարագ մատուցեց Հայոց մեծ եղեռնի զոհերի հիշատակի համար և ի լուր աշխարհի հայտարարեց. << Հայոց ցեղասպանությունը 20-րդ դարի առաջին ցեղասպանությունն է>>:
Հայոց եղեռնի 100-ամյա տարելիցին նվիրված միջոցառումները պատվով և վեհությամբ իրականացնելու համար Արմավիրի հոգևոր առաջնորդը շնորհակալություն հայտնեց բոլոր պետական այրերին. <<Թող ողջ աշխարհն իմանա, որ այս տարելիցը մենք նշում ենք ոչ խոնարհված, ոչ երկյուղով, այլ հպարտությամբ` որպես վերածննդի ազգ: Թող իմանան, որ հայը կա, կմնա և որպես ազգ կշարունակի բարձր պահել իր անունը: Աստված թող մեզ ուժ տա և միշտ առաջ շարժվենք…>>:
Հավելենք, որ վերը նշված համայնքներում տեղի ունեցան նաև <<Հիշում եմ և պահանջում>> խորագիրը կրող միջոցառումներ` դպրոցների սաների մասնակցությամբ: