Տեղեկատվական կենտրոն
Նորություններ
Արմավիրի մարզում շարունակվում են Հայոց ցեղասպանության 100-րդ տարելիցին նվիրված միջոցառումները
06.05.2015
ՀՀ Արմավիրի մարզպետ Աշոտ Ղահրամանյանն այսօր Առատաշեն համայնքում ներկա գտնվեց Հայոց ցեղասպանության 100-րդ տարելիցին նվիրված խաչքարի օծմանը, որը կատարվեց Արմավիրի թեմի առաջնորդ Տեր Սիոն եպիսկոպոս Ադամյանի ձեռամբ:
Ցեղասպանության 100-րդ տարելիցին նվիրված խաչքարը կանգնեցվել է համայնքապետարանի կողմից և խորհրդանշում է Հայոց մեծ եղեռնի նահատակների հոգիների փրկությունն ու հայ ժողովրդի վերածնունդը: Իսկ խաչքարի հեղինակն է քանդակագործ Աշոտ Սահակյանը:
Օրվա խորհուրդը կոմիտասյան ինքնատիպ կատարումներով և ասմունքով լրացրեցին Առատաշենի միջնակարգ դպրոցի սաները:
Իսկ արդեն Վաղարշապատի Խ. Աբովյանի անվան թիվ 4 հիմնական դպրոցում կազմակերպված «Հիշում եմ և պահանջում» խորոգիրը կրող միջոցառմանը, որին մասնակցեց նաև մարզպետ Աշոտ Ղահրամանյանը, կրթօջախի սաները հիմնավորեցին այն գաղափարը, որ մատաղ սերունդը շատ լավ հիշում է թուրքերի կատարած եղեռնագործությունը և պահանջում, որ աշխարհը ճանաչի այն` թույլ չտալու համար նման ոճիրների կրկնությունը:
Միջոցառման մասնակիցներին աշակերտներն ասմունքի, երգի և բեմադրության միջոցով ներկայացրեցին Հայոց ցեղասպանության պատմության կարևորագույն փաստերը և ընդգծեցին հայի անկոտրում ոգին ու հայ ժողովրդի վերածնունդը:
Աշխարհի տարբեր վայրերում ապրող հայության շրջանում կարևորելով Հայոց ցեղասպանության 100-րդ տարելիցին նվիրված ոգեկոչման միջոցառումների իրականացումը` մարզպետ Աշոտ Ղահրամանյանը վստահություն հայտնեց, որ հայ ժողովրդի պահանջատիրության բուռն կոչը կբերի Հայ դատի արդար լուծման: Նա իր խոսքում ընդգծեց նաև, որ հայ ժողովուրդը դատապարտված է հավերժ ապրելու, քանի որ ունի նման սերունդ, որը չի դադարում հիշել ու պահանջել:
Միջոցառման ավարտին Վաղարշապատի Խ. Աբովյանի անվան թիվ 4 հիմնական դպրոցի տնօրեն Արուսյակ Մուրադյանը 2014-2015 ուսումնական տարվա ընթացքում պետական, ազգային և հոգևոր տոներին նվիրված միջոցառումները լավագույնս կազմակերպելու, մատաղ սերնդի հոգևոր-մշակութային և ռազմահայրենասիրական դաստիարակության աշխատանքները բարձր մակարդակով իրականացնելու համար մարզպետ Աշոտ Ղահրամանյանի կողմից պարգևատրվեց պատվոգրով: