Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Մուսալեռան հուշահամալիրում տեղի ունեցավ ավանդական դարձած Տոլմայի փառատոնը
16.05.2015
«Հայ խոհարարական ավանդույթների զարգացման և պահպանման» ՀԿ-ի նախաձեռնությամբ և Արմավիրի մարզպետարանի աջակցությամբ այսօր Մուսալեռան հուշահամալիրում տեղի ունեցավ հանրության շրջանում մեծ ճանաչում գտած «Ուդուլի» տոլմայի համահայկական հինգերորդ փառատոնը, որի խորագիրն էր «Տոլման Հայկական լեռնաշխարհում», իսկ կարգախոսը` «Տոլման ինքնության ցուցիչ...»:
Մուսալեռան հուշահամալիրում բացված 20 տաղավարներում ներկայացված էին հայկական ավանդական ուտեստի տասնյակ տեսակներ՝ պատրաստված մայրաքաղաքի ռեստորանային տարբեր համալիրների, Արմավիրի մարզի համայնքապետարանների, առանձին կազմակերպությունների և խոհարարների կողմից:
Տոլմայի փառատոնն իր շուրջ էր համախմբել մեծ թվով մարդկանց, այդ թվում` օտարերկրյա հյուրերի` հնարավորություն ընձեռելով հայկական ավանդակ կերակրատեսակը համտեսել ոչ ավանդական միջավայրում:
Փառատոնին մասնակցեց նաև ՀՀ Արմավիրի մարզպետ Աշոտ Ղահրամանյանը: Նա շրջեց բացված տաղավարներով, օգտվեց հյուրասիրությունից և բարեմաղթանքի խոսքեր հղեց հայ խոհարարական ավանդույթները պահպանողներին:
Հանդես գալով ողջույնի խոսքով` մարզպետը նշեց, որ տոլմայի նմանօրինակ փառատոնի կազմակերպումը ևս մեկ առիթ է աշխարհին ներկայացնելու, որ տոլման հայկական ուտեստ է և այն ամենալավը պատրաստում են հայ խոհարարները: Մարզպետն իր խոսքում կոչ արեց պահպանել աշխարհում հայտնի ու հնագույն համարվող մեր ազգային խոհանոցի բոլոր կերակրատեսակներն ու ավանդույթները և հպարտությամբ փոխանցել գալիք սերունդներին:
«Ուդուլի» տոլմայի համահայկական փառատոնին աջակցելու համար «Հայ խոհարարական ավանդույթների զարգացման և պահպանման» ՀԿ-ի նախագահ Սեդրակ Մամուլյանը շնորհակալագիր հանձնեց մարզպետ Աշոտ Ղահրամանյանին:
Տոլմայի համահայկական հինգերորդ փառատոնն ուղեկցվեց համերգային ծրագրով և ավարտվեց մրցանակաբաշխությամբ: Մրցանակային տեղեր զբաղեցնելու համար տաղավարները միմյանց հետ մրցում էին «Լավագույն համ», «Լավագույն տեսք» և «Լավագույն մտահաղացում» անվանակարգերում: Նշված անվանակարգերում հաղթողները «Հայ խոհարարական ավանդույթների զարգացման և պահպանման» ՀԿ-ի կողմից պագևատրվեցին մեդալներով և պատվոգրերով:
Իսկ «Ուդուլի» տոլմայի փառատոնի բացարձակ հաղթող ճանաչվեց և մարզպետ Աշոտ Ղահրամանյանի կողմից խորհրդանշական հուշանվերով և պատվոգրով պարգևատրվեց Աֆրիկյանների պանդոկը:
