Տեղեկատվական կենտրոն
Նորություններ
Մարզպետ Աշոտ Ղահրամանյանը ծանոթացել է մարզում ընթացող ցորենի բերքահավաքին
07.07.2015
ՀՀ Արմավիրի մարզի հացահատիկի ցանքատարածքներում հունիսի 20-ից սկսվել է բերքահավաքը, որը կշարունակվի մինչև հուլիսի 20-25-ը` կախված ուղղաձիգ գոտիականությունից: Մարզում նկատելի է հացահատիկի բարձր բերքատվություն:
Բերքահավաքի ընթացքին այսօր ծանոթացավ ՀՀ Արմավիրի մարզպետ Աշոտ Ղահրամանյանը` մարզպետարանի աշխատակազմի գյուղատնտեսության և բնապահպանության վարչության պետ Արթուր Այվազյանի ուղեկցությամբ այցելելով Լուկաշին և Մրգաշատ համայնքներ:
Մարզպետին զեկուցվեց, որ Մրգաշատ համայնքում այս տարի ցորենի ցանքատարածությունները կազմում են 175 հեկտար, իսկ Լուկաշինում` 85 հեկտար: Նշված համայնքներում գյուղացիական տնտեսությունները գոհ են ցորենի բերքատվությունից և բերքահավաքի ընթացքից: 1 հեկտարից սպասվում է միջինը 45 ցենտներ ցորեն: Նրանց միակ մտահոգությունը ցորենի մթերման ցածր գինն է, որն այս տարի նախատեսված է 100 դրամ, նախորդ տարվա 130-140 դրամի փոխարեն:
Մարզպետ Աշոտ Ղահրամանյանն իր խոսքում նշեց, որ արվել է ամեն ինչ ցորենի բերքահավաքն առանց խոչընդոտների կազմակերպելու համար, և այժմ մարզում աշխատում է 95 կոմբայն, որից 46-ն այլ մարզերից են: Նա վստահեցրեց, որ գյուղացիական տնտեսություններին աջակցություն կցուցաբերվի նաև Բաղրամյանի հացամթերքների կոմբինատում հացահատիկը բարձր գնով մթերելու հարցում:
Ըստ մարզպետի` աշնանացան ցորենի և գարու ցանքատարածքները մարզում կազմում են 5390 հեկտար և 1 հեկտարից միջին բերքատվությունը կլինի 43-45 ցենտներ, իսկ առանձին հողակտորներում բերքատվությունը կհասնի մինչև 72 ցենտների:
Մարզպետ Աշոտ Ղահրամանյանն իր խոսքում նշեց նաև, որ վերջին տարիներին մարզում հացահատիկի ցանքատարածքները կրճատվել են, փոխարենն ավելացել են բանջար-բոստանային կուլտուրաների ցանքատարածությունները: