Արմավիրի մարզպետի աշխատակազմ

ՀՀ Արմավիրի մարզի հրատապ խնդիրների լուծման 6-րդ ծրագրի շրջանականերում Մայիսյան գյուղի մանկապարտեզում բնակվող չորս ընտանիք կապահովվի նոր բնակարանով, որի համար նախատեսված է 26 մլն 700 հազար դրամի չափով պետական աջակցություն:

Նշված ընտանիքները 1994 թվականին անօթևան են մնացել բազմաբնակարան երկհարկանի շենքի հրդեհման պատճառով: Որպես կացարան նրանց հատկացվել է մանկապարտեզի շենքը, որը տարիների ընթացքում մասամբ ձևափոխել են և հարմարություններ ստեղծել ապրելու համար: Սակայն 21 տարի շարունակ նրանք սեփական բնակարան ունենալու հույսը չեն կորցրել և այսօր այն արդարացվեց:

Հանդիպելով մանկապարտեզում տարիներ շարունակ իրենց օթևանը գտած չորս ընտանիքի անդամների հետ` մարզպետ Աշոտ Ղահրամանյանը նրանց ուրախությամբ տեղեկացրեց ՀՀ կառավարության համապատասխան որոշմամբ բնակարանային ապահովման նպատակով նախատեսված պետական աջակցության տրամադրման մասին, որը նրանք ընդունեցին մեծ ոգևորությամբ և հուզմունքով` իրենց շնորհակալությունն ու երախտագիտությունը հայտնելով մարզպետին և պետական բարձրաստիճան այրերին: