Տեղեկատվական կենտրոն
Նորություններ
Արմավիրի քաղաքային այգում բացվեց օլիմպիական չեմպիոն Վասիլի Ալեքսեևի բրոնզե կիսանդրին
03.08.2015
Հայ Առաքելական Եկեղեցու Արմավիրի թեմի առաջնորդ Տեր Սիոն եպիսկոպոս Ադամյանի հանդիսապետությամբ օգոստոսի 1-ին Արմավիրի քաղաքային այգում բացվեց ռուս ծանրորդ, օլիմպիական խաղերի կրկնակի չեմպիոն, աշխարհի առաջնության ութակի հաղթող, համաշխարհային 80 ռեկորդների հեղինակ, 20-րդ դարի լավագույն մարզիկ, ԽՍՀՄ սպորտի վարպետ և հավաքականի մարզիչ, Ռուսաստանի Դաշնության Շախտա քաղաքի պատվավոր քաղաքացի Վասիլի Ալեքսեևի բրոնզե կիսանդրին:
Մեծանուն մարզիկի կիսանդրու բացմանը ներկա էին ՀՀ Արմավիրի մարզպետ Աշոտ Ղահրամանյանը, Արմավիրի քաղաքապետ Ռուբեն Խլղաթյանը, ՌԴ Շախտայի քաղաքապետի տեղակալ Իգոր Մեդվեդևը, Վասիլի Ալեքսեևի որդին` Դիմիտրի Ալեքսեևը, ազգությամբ հայ, հունահռոմեական ըմբշամարտի օլիմպիական չեմպիոն, Ռոստովի մարզի Օրենսդիր ժողովի պատգամավոր Վարթերես Սամուրգաշևը, ծանրամարտիկ, օլիմպիական խաղերի չեմպիոն Օգսեն Միրզոյանը և մեծ թվով հյուրեր:
Նշենք, որ 2014 թվականի մայիս ամսին ՀՀ Արմավիրի և ՌԴ Շախտի քաղաքապետերի միջև կնքվել է երկու քաղաքների բարեկամությունը հաստատող փոխգործակցության հուշագիր, որի շրջանակում էլ Շախտի քաղաքը Արմավիրին է նվիրաբերել Վասիլի Ալեքսեևի բրոնզե կիսանդրին` քաղաքային այգում տեղադրելու համար: