Տեղեկատվական կենտրոն
Նորություններ
Արմավիրում ընդունեցին 4-րդ բանակային կորպուսում ծառայություն անցնող մարզի զինծառայողներին
06.11.2015
Ձևավորված ավանդույթի համաձայն այսօր Արմավիր քաղաքում մարզային իշխանությունները հանդիսավոր պայմաններում ընդունեցին 4-րդ բանակային կորպուսում ծառայությություն անցնող մարզի 21 լավագույն զինծառայողներին, որոնք հնարավորություն ունեցան հանդիպելու իրենց հարազատներին և հրամարատարության կողմից 5-օրյա հանգստի իրավունք ստացան:
Օրվա առթիվ Արմավիրի մշակույթի տանը կազմակերպված միջոցառմանը մասնակցում էին ՀՀ Արմավիրի մարզպետ Աշոտ Ղահրամանյանը, Արմավիրի թեմի առաջնորդ Տեր Սիոն եպիսկոպոս Ադամյանը, ՊՆ 4-րդ բանակային կորպուսի հրամանատար, գեներալ-մայոր Անդրանիկ Մակարյանը, ՊՆ և ԶՈՒ բարձրաստիճան սպաներ:
Տերունական աղոթք հնչեցնելով, ապա օրհնության խոսք հղելով ներկաներին` Արմավիրի թեմի առաջնորդ Տեր Սիոն եպիսկոպոս Ադամյանը նշեց. <<Մեծագույն գոհունակությամբ և ուրախությամբ մասնակցում ենք այս հանդիպմանը, որը ամրապնդում է վստահությունը ժողովրդի և բանակի միջև: Բանակը մեր ծնունդն է, ժողովրդի ծնունդն է, հաստատուն, կայուն մի կառույց, որը մեր անկախության և պաշտպանության գրավականն է: Այդ իսկ պատճառով մենք մեծագույն սիրով ու գուրգուրանքով պետք է վերաբերվենք մեր բանակին…>>:
Ողջունելով միջոցառման մասնակիցներին` մարզպետ Աշոտ Ղահրամանյանը կարևորեց պաշտտպանության նախարարի անմիջական աջակցությամբ իրականացվող նման միջոցառումները, որոնք, ըստ նրա, նպաստում են բանակ-հասարակություն կապի ամրապնդմանը: Նա իր խոսքում բարձր գնահատեց զինծառայողների մարտական պատրաստականությունը և կարգապահությունը` նրանց մաղթելով ծառայել խաղաղ պայմաններում և վերադառնալ ընտանիք ու լծվել պետականաշինության գործին:
Մարզում բանակ-հասարակություն կապի զարգացման և հայրենանվեր գործունեության համար ՊՆ 4-րդ բանակային կորպուսի հրամանատար, գեներալ-մայոր Անդրանիկ Մակարյանի կողմից մարզպետ Աշոտ Ղահրամանյանը պարգևատրվեց շնորհակալագրով: Հայրենիքի համար լավ զավակ և օրինակելի զինվոր դաստիարակելու համար` հրամանատարի կողմից շնորհակալագրերով պարգևատրվեցին նաև զինծառայողների ծնողները:
Միջոցառումն անփոփվեց Արմավիրի մարզի տարբեր մշակութային խմբերի և անհատ կատարողների ելույթներով: