Տեղեկատվական կենտրոն
Նորություններ
Խաչքարի բացում և պուրակի անվանակոչում՝ նվիրված ապրիլյան պատերազմում զոհված Հովսեփ Կիրակոսյանի հիշատակին
23.08.2016
Հովսեփ Գեղամի Կիրակոսյանը ծնվել է 1988 թվականին, ՀՀ Արմավիրի մարզի Ապագա համայնքում: Նա սովորել է Վազգեն Սարգսյանի անվան ռազմական ինստիտուտում, ուսումնառությունից հետո տեղափոխվել է Ստեփանակերտ, ապա՝ Մատաղիս:
Համայնքում մերօրյա հերոսին հիշում են որպես լավ մարդու, ով հանուն իր հայրենիքի պատրաստ էր ամեն ինչի: Եվ իսկապես, Հովսեփը հանուն հայրենիքի ապագայի և խաղաղ օրվա համար իր կյանքը նվիրաբերեց ժողովրդին՝ դառնալով հայ ազգի հերոս, ով երազում էր պայծառ ապագայի և լավ օրվա մասին:
Ապագա համայնքի բնակիչները մեծ ցավ են ապրում համագյուղացու մահվան համար, միևնույն ժամանակ հպարտանում, որ ճանաչել են նրան: Եվ այսօր, ի նշան մեծագույն հարգանքի և հավերժ հիշատակի, Ապագա համայնքում տեղի ունեցավ ապրիլյան քառօրյա պատերազմում ռազմական գործողությունների արդյունքում հերոսաբար զոհված ԻՍՎ հրամանատար, կապիտան Հովսեփ Կիրակոսյանի հիշատակին նվիրված խաչքարի բացում և պուրակի անվանակոչում:
Նախաձեռնության հեղինակը եղել է Ապագա համայնքի ղեկավար Արտաշես Բարսեղյանը: Նրա ձեռնարկին արձագանքել է Ապագա համայնքի բնակիչ, բարերար Ավագ Փաթեյանը, ում հովանավորությամբ էլ կառուցվել է հերոս հայորդու հիշատակը հավերժացնող խաչքարը՝ քանդակագործ Ռուբեն Նալբանդյանի կողմից։
Հիշարժան օրը Հովսեփ Կիրակոսյանի ընտանիքի, համայնքի բնակիչների և հյուրերի հետ կիսեց նաև ՀՀ Արմավիրի մարզպետ Աշոտ Ղահրամանյանը: Նա ողջունելով ներկաներին՝ նշեց. «Այսօր մենք նորից ու նորից մեր խոնարհումն ենք բերում այն քաջորդիների հիշատակի առաջ, որոնք ապրիլյան քառօրյա պատերազմի ժամանակ իրենց կյանքը տվեցին մեր երկրի պաշտպանության համար: Հովսեփները, Արսենները, Վարդանները, մեր բոլոր անմահացած հերոս զավակները եղել են, կան ու հավերժ կլինեն մեր ազգի գոյության ողջ ժամանակահատվածում:
Ես ցանկանում եմ, որ մեր Հովսեփի երկու որդիները և մեր բոլորի զավակներն ապրեն խաղաղության պայմաններում՝ կերտելով այն պետությունն ու իրականությունը, որում ցանկանում ենք ապրել ու արարել:
Մեր հերոս հայորդու հարգարժան հարազատներ, Ապագա համայնքի սիրելի բնակիչներ, բոլորիդ ցանկանում եմ համբերություն, ուժ, կորով՝ հանուն մեր նորօրյա հաղթանակների և նվաճումների»:
Օրվա առթիվ Հովսեփ Կիրակոսյանի անունը կրող պուրակում կազմակերպվել էր միջոցառում, որի ընթացքում դպրոցի սաները հայրենասիրական երգ ու պարով, ասմունքով իրենց հարգանքի տուրքը մատուցեցին հերոս համագյուղացու հիշատակին՝ մեծ հուզմունք և ոգևորություն պարգևելով ներկաներին: