Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Վանանդ համայնքի միջնակարգ դպրոցը տոնեց հիմնադրման 30-ամյակը
02.09.2016
ՀՀ Արմավիրի մարզի Բաղրամյանի տարածաշրջանի Վանանդ համայնքի միջնակարգ դպրոցն այսօր տոնեց հիմնադրման 30-ամյակը: Հոբելյանական օրվան նվիրված միջոցառմանը ներկա էին ՀՀ Արմավիրի մարզպետ Աշոտ Ղահրամանյանը, մարզպետարանի աշխատակազմի կրթության, մշակույթի և սպորտի վարչության պետ Գայանե Սայադյանը, դպրոցին մոտ կանգնած մեծ թվով գործընկերներ, հյուրեր:
Տարիների ավանդույթ ունեցող դպրոցը տոնական մթնոլորտում և բարձր տրամադրությամբ հյուրընկալեց միջոցառման մասնակիցներին՝ մեծ հպարտությամբ նրանց հաղորդակից դարձնելով կրթօջախի պատմությանը, տարիների ձեռքբերումներին, որոնցից մասնավորապես առանձնացվում է Հայաստանի սոցիալական ներդրումների հիմանադրամի, համայնքապետարանի և մարզպետարանի աջակցությամբ իրականացված դպրոցի հիմնանորոգումը, կրթության արդի պահանջներին համապատասխանող պայմանների ստեղծումն ու նյութատեխնիկական անհրաժեշտ բազայով ապահովումը:
Դպրոցի համար հատկանշական է եղել նաև Հայաստանի մանուկներ հիմնադրամի հետ համագործակցությունը, որի արդյունքում կրթօջախում բացվել են տարբեր պարային և ստեղծագործական խմբակներ, կազմակերպվել են ամառային ճամբարներ:
Բարձր գնահատելով տարիների ընթացքում կրթօջախի ունեցած հաջողությունները և շնորհավորելով բոլորին տոնական օրվա կապակցությամբ՝ մարզպետ Աշոտ Ղահրամանյանը դպրոցին մաղթեց արգասաբեր տարիների գործունեություն՝ լի նորանոր հաջողություններով ու ձեռքբերումներով: Այդ համատեքստում նա հատկապես կարևորեց մանկավարժների անաչառ ներդրումը մատաղ սերնդի կրթության և դաստիարակության գործում:
Մատնանշելով կրթօջախում ուսուցման համար ստեղծված լավագույն պայմանները՝ մարզպետը կոչ արեց աշակերտներին օգտվել առկա հնարավորություններից, կրթվել և պիտանի մարդ դառնալ հասարակության ու պետության համար:
Վանանդի միջնակարգ դպրոցի մանկավարժներ Գրետա Սահակյանը և Սվետլանա Ղազարյանը երկարամյա անբասիր աշխատանքային գործունեության, մատաղ սերնդի կրթության և դաստիարակության գործում ունեցած նշանակալի ավանդի համար պատվոգրեր ստացան մարզպետ Աշոտ Ղահրամանյանի կողմից:
