Արմավիրի մարզպետի աշխատակազմ

Այսօր ՀՀ Երևանի կոնյակի գործարանի (ԵԿԳ) Արմավիրի մասնաճյուղում մեկնարկեց խաղողի մթերումը, որի ընթացքին տեղում հետևեց նաև ՀՀ Արմավիրի մարզպետ Աշոտ Ղահրամանյանը: Նա շրջեց գործարանում, եղավ լաբորատորիայում, որտեղ փորձաքննություն էր անցնում մթերվող բերքը:

Լրագրողներին տված հարցազրույցում մարզպետ Աշոտ Ղահրամանյանը նշեց, որ հավատարիմ մնալով մարզի խաղողագործների հետ կնքված պայմանագրային պարտականություններին` ԵԿԳ Արմավիրի մասնաճյուղն այս տարի կմթերի 18 հազար 200 տոննա խաղող, 1 կգ-ը` 130 դրամով: Նրա խոսքով` ցրտահարությամբ և կարկտահարությամբ պայմանավորված` մարզում կարտադրվի 100-105 հազար տոննա խաղող, նախորդ տարվա 137 հազար տոննայի փոխարեն:

Մարզպետ Աշոտ Ղահրամանյանը վստահեցրեց, որ իշխանությունների կողմից արվում է ամեն ինչ՝ արտադրված խաղողի մթերումն ամբողջությամբ և առանց խոչընդոտների կազմակերպելու համար:

Հավելենք, որ մյուս վերամշակող ընկերությունները խաղողի մթերումը կսկսեն սեպտեմբերի 17-ից: