Տեղեկատվական կենտրոն
Նորություններ
ՀՀ Արմավիրի մարզպետի ուղերձն ուսուսուցչի օրվա առթիվ
05.10.2016
Սիրելի ուսուցիչներ,
Ջերմորեն շնորհավորում եմ ձեզ մասնագիտական տոնի՝ Ուսուցչի օրվա առթիվ։
Գրերի գյուտից ի վեր հայ ժողովրդի կյանքում, հայապահպանության սուրբ գործը վստահվել է ուսուցչին: Եվ դարեր շարունակ հայ ուսուցիչը նոր սերնդին է փոխանցել ոչ միայն գիտելիքներ, այլև արմատավորել է սեր՝ հայրենիքի և ուսման նկատմամբ: Եվ հայ մարդը դարեր շարունակ գնահատել է մանկավարժի գործը` ակնածանքով ու մեծարանքով:
Դուք ամենօրյա աշխատանքով նախապատրաստում եք Հայաստանի վաղվա օրը, կարողանում եք, անկախ առկա խնդիրներից ու հոգսերից, սփռել լույս դեպի գիտելիքը, դեպի հավատն ու իրական արժեքները:
Դուք թանկ գնով ձեռք բերված անկախ Հայաստանի հզոր գաղափարների կրողն ու փոխանցողն եք, նաև նրա դժվարին օրերի հավատարիմ զինակիցը և մեծ նպատակների ու հայրենասիրության վստահելի ջահակիրը:
Այսօրվա բարեփոխումների գործընթացում մեծ ու արժեքավոր է ձեր դերակատարումը:
Մեր 25-ամյա անկախ պետությունը զարգացման փուլում է, մենք կրկին ու կրկին ապավինում ենք ձեզ, սիրելի ուսուցիչներ, մեր պետության հզորացման ու ազգային իղձերի իրականացման գործում: Ձեր գիտելիքն ու վարպետությունը, ստեղծագործական ունակությունն ու կենսափորձը, ինչպես նաև հոգատարությունն ու ներողամտությունը խիստ անհրաժեշտ են:
Մեր երկրի, մեր պետության և նրա ղեկավարության ուշադրության կենտրոնում են դպրոցը և կրթության համակարգը: Եվ դա արվում է աննախադեպ մեծ ու բազմաբովանդակ ծրագրերով` հայացքը դեպի ապագա:
Առանձնակի ուզում եմ շնորհավորել մեր ավագ սերնդի մանկավարժներին, ովքեր անցել են վաստակած հանգստի, սակայն իրենց խորհուրդներով և բազմամյա փորձով շարունակում են իրենց նպաստը բերել կրթության համակարգին:
Սիրելի ուսուցիչներ,
այս գեղեցիկ տոնը ևս մեկ առիթ է, որ ձեր բոլոր սաները` անկախ տարիքից ու մասնագիտությունից, գնահատանքի ու երախտագիտության խոսքեր հղեն` ասելով. մենք ձեզ միշտ հիշում և երախտապարտ ենք: Փառք ու պատիվ ձեզ, կրթության բազմաշերտ ոլորտում աշխատող մանկավարժներ, կրկին շնորհավորելով մասնագիտական և ավանդական տոնի առթիվ` մաղթում եմ ձեզ անձնական երջանկություն, ոգու և կամքի արիություն, ստեղծագործական աշխատանքի նոր եռանդ, մեծ համբերություն և բազում հաջողություններ:
Շնորհավոր ձեր տոնը, սիրելի ուսուցիչներ:
Մեծագույն սիրով և հարգանքով`
ՀՀ Արմավիրի մարզպետ Ա. Ղահրամանյան