Արմավիրի մարզպետի աշխատակազմ

Ինչպես ամեն տարի, այս տար ևս հոկտեմբեր ամսի երկրորդ շաբաթը Մրգաշատ համայնքում նշանավորվեց Մաճառի տոն համայնքային տոնախմբությամբ, որի կազմակերպումն աշնանային բերքահավաքից հետո համայնքում արդեն ավանդույթ է դարձել:

Տոնական օրը մրգաշատցիների, նրանց ուրախությունը կիսող հարյուրավոր հյուրերի հետ անցկացրեց նաև ՀՀ Արմավիրի մարզպետ Աշոտ Ղահրամանյանը: Մրգաշատցիները հյուրերին դիմավորեցին համայնքի հրապարակում բացված առատ սեղանների շուրջ` լի բերքուբարիքով, տարատեսակ ուտեստներով, աղանդերով և օրվա խորհուրդը հանդիսացող մաճառով:

Համայնքի ղեկավարի ուղեկցությամբ մարզպետ Աշոտ Ղահրամանյանը և տոնակատարության մասնակիցները մոտեցան բացված սեղաններին, օգտվեցին հյուրասիրությունից և բաժակ բարձրացրեցին մրգաշատցիների բարեկեցության, նրանց ապագա հաջողությունների ու երկրի շենացման համար:

Շնորհավորելով բոլորին համայնքի համար տոնական դարձած միջոցառման կապակցությամբ` մարզպետը մրգաշատցիներին մաղթեց, որ հողագործության մեջ ներդրած ջանքն ու եռանդը, ստեղծած նյութական բարիքներն օգտագործվեն իրենց բարօրության համար:

«Գյուղատնտեսական անբարենպաստ տարվա պայմաններում ձեզ հաջողվեց լավ բերք աճեցնել, հաղթահարել դժվարությունները: Մաճառի տոնի առթիվ բոլորս հավաքվել ենք ուրախանալու, հպարտանալու ձեր ստեղծած բերքուբարիքով և գովաբանելու ձեր աշխատանքը: Փառք ու պատիվ ձեզ, հողի լեզուն հասկացող բազմավաստակ մշակներ»,- իր խոսքում նշեց մարզպետ Աշոտ Ղահրամանյանը` նորանոր հաջողություններ ու ձեռքբերումներ մաղթելով և համայնքին, և նրա բնակչությանը:

Տոնակատարությունը համայնքում կշարունակվի մինչ ուշ երեկո: Տոնական բարձր տրամադրությունը կուղեկցվի Գուսան Հայկազունի խմբի և համայնքի մշակույթի տան սաների կատարումներով: