Արմավիրի մարզպետի աշխատակազմ

ՀՀ Արմավիրի մարզպետ Աշոտ Ղահրամանյանն այսօր հրավիրված տարեվերջյան ամփոփիչ մամլո ասուլիսի ընթացքում ներկայացրեց հաշվետու ժամանակահատվածում ըստ ոլորտների իրականացված հիմնական աշխատանքները, խոսեց նաև հիմնախնդիրների ու նախատեսվող ծրագրերի մասին:

Մարզպետն իր խոսքում նշեց, որ տարին հատկապես գյուղատնտեսության առումով շատ խոստումնալից էր, սակայն անբարենպաստ եղանակային պայմանները, որոնք արտահայտվեցին ցրտահարության ու կարկուտի տեսքով, 29 մլրդ դրամից ավել վնաս հասցրեցին գյուղացիական տնտեսություններին: Սակայն, ըստ մարզպետի, հողի մշակը կարողացավ ստեղծված իրավիճակը հարթել քրտնաջան աշխատանքի միջոցով և բերք ու բարիք ստեղծել:

Աշոտ Ղահրամանյանի խոսքով` բացի պտղից, մնացած մշակաբույսերի արտադրության մասով նախորդ տարվա ցուցանիշներն աճել են, 1508 հեկտարով էլ ավելացել են ցանքատարածությունները: Նրա տեղեկացմամբ` ավելացում է գրանցվել նաև անասնագլխաքանակի մասով, և արդեն 2-րդ տարին է, ինչ մարզում անասնագլխաքանակը գերազանցում է խորհրդային տարիների ցուցանիշը: 

Անդրադառնալով քաղաքաշինության ոլորտին` մարզպետ Աշոտ Ղահրամանյանը մասնավորապես ընդգծեց, որ 2016թ.-ին պետական բյուջեից մարզպետարանի ծրագրերի իրականացման համար հատկացվել է 146,898,100.0 դրամ, որի շրջանակներում իրականացվել են Շենիկ համայնքի մշակույթի տան հիմնանորոգման, Արմավիր քաղաքի, Ոսկեհատ, Փարաքար, Արտիմետ համայնքների մանկապարտեզների վերանորոգման աշխատանքները, ինչպես նաև Թաիրով գյուղի միջնակարգ դպրոցի շենքի տեխնիկական վիճակի ուսումնասիրության և վերանորոգման աշխատանքների նախագծանախահաշվային փաստաթղթերի մշակումը: Ընդհանուր առմամբ, ըստ մարզպետի, հաշվետու տարում մարզում 4 մլրդ դրամից ավել տարբեր ներդրումային ծրագրեր են իրականացվել:

Խոսելով ճանապարհաշինության ոլորտում իրականացված աշխատանքների մասին` մարզպետը նշեց, որ 2016թ.-ին պետական բյուջեից Արմավիրի մարզպետարանին մարզային նշանակության ավտոճանապարհների ընթացիկ պահպանման, շահագործման համար հատկացվել է 39.3 մլն դրամ:

Ըստ նրա` 2015-2016թթ.-ի ընթացքում հիմնանորոգվել է Տ-3-50 (Մ-5-Նորապատ-Մրգաշատ-Արևիկ-Երասխահուն) 18.8 կմ երկարությամբ ավտոճանապարհը՝ 2.5 մլրդ դրամ ընդհանուր արժողությամբ: Ավարտվել է ՀՀ պետական բյուջեի ֆինանսավորմամբ Տ-3-51(Մ-5 Սարդարապատ-Նոր Արմավիր-Տ-3-52 Բամբակաշատ) մարզային նշանակության 1.6 կմ երկարության ավտոճանապարհի 0.8 կմ հատվածի հիմնանորոգումը՝ 34.5 մլն դրամ արժողությամբ: Հիմնանորոգման փուլում է գտնվում Ասիական զարգացման բանկի ֆինանսավորմամբ Տ-3-17 (Հ-15- Ջանֆիդա Թուրքիայի սահման) մարզային նշանակության 8.3 կմ երկարությամբ ճանապարհի Ջանֆիդա համայնքի 2.6 կմ երկարությամբ հատվածը՝ 350.0 մլն դրամ ընդհանուր արժողությամբ:

Մարզպետն անդրադարձավ նաև առողջապահության ոլորտին` մասնավորապես նշելով, որ հաշվետու ժամանակահատվածում գրանցվել է 2254 ծնունդ, 18-ից բարձր տարիքի 1314 մահացության դեպք: Արձանագրվել է 0-18 տարեկան երեխաների մահացության 14 դեպք, որից 5-ը 0-1 տարեկան, իսկ մայրական մահացության դեպք չի եղել:

Մարզպետ Աշոտ Ղահրամանյանի խոսքով` հաշվետու տարում կենտրոնական գնմամբ և մարդասիրական ճանապարհով տարբեր հիվանդությունների բուժման նպատակով ստացվել և մարզի բուժհաստատություններին են բաշխվել 164,519.142 հազ. դրամ արժողությամբ տարբեր դեղամիջոցներ: Հաշմանդամներին, զոհված ազատամարտիկների ընտանիքի անդամներին առողջարանային բուժման համար հատկացվել է 157 ուղեգիր: Մարզպետարան դիմած 78 քաղաքացու էլ տրվել է 30 միջնորդագրեր և 48 ուղեգրեր՝ մարզի տարածքում գործող հիվանդանոցներում և հանրապետության մասնագիտական բուժհաստատություններում պետական պատվերի շրջանակներում ստացիոնար բուժում ստանալու համար:

Անդրադառնալով սոցիալական ապահովության բնագավառին` նա ընդգծեց, որ մարզի զարգացման առաջնային նպատակներից շարունակում է մնալ սոցիալական ծառայությունների մատչելիությունը բոլոր խոցելի խմբերի համար, ինչպես նաև սպասարկման որակի բարձրացումը:

Մարզպետ Աշոտ Ղահրամանյանը տեղեկացրեց, որ հաշվետու ժամանակահատվածում մարզի երեք սոցիալական աջակցության տարածքային գործակալություններում կազմակերպվել և իրականացվել են ընտանիքների անապահովության գնահատման համակարգում հաշվառված ընտանիքների փաստագրման աշխատանքները: 2016թ.-ի դեկտեմբերի 1-ի դրությամբ փաստագրվել է 6973 ընտանիք, որից նպաստառու է 4740-ը, սոցիալական նպաստ է ստացել 1141-ը, իսկ հրատապ դրամական օգնություն` 957 ընտանիք: Եվս 608 ընտանիքի էլ «Մարզպետարանի կողմից իրականացվող ծրագրերի այլ նպաստներ բյուջեից» հոդվածով 2016թ.-ի ընթացքում հատկացվել է 23 865.0 հազ. դրամի չափով դրամական աջակցություն:

Մարզպետի փոխանցմամբ` 2016թ.-ի ընթացքում անհատույց պետական ֆինանսական աջակցություն է ստացել Արմավիրի մարզպետարանում հաշվառված բնակարանային պայմանների բարելավման կարիք ունեցող զոհված (մահացած) և հաշմանդամ դարձած զինծառայողի /ազատամարտիկի/ 4 ընտանիք:

Մարզպետ Աշոտ Ղահրամանյանն անդրադարձավ նաև կրթության ոլորտին` խոսելով կրթության որակի բարձրացմանն ուղղված ծրագրերի մասին, այդ թվում` դպրոցաշինության և ուսուցիչների մասնագիտական կատարելագործման ու ընդհանուր մեթոդական օժանդակության:

Նա իր խոսքում նշեց, որ 2016-2017 ուսումնական տարում մարզի դպրոցների աշակերտների թիվը կազել է 31610, որից 3738-ն առաջին դասարանցի: Դասարանների ընդհանուր թիվը եղել է 1628: Հաշվետու տարում 1189 երեխայի համար 47 դպրոցում իրականացրել է ներառական կրթություն: Պետական բուհական ընդունելության քննությունների արդյունքում էլ մարզի շուրջ 585 շրջանավարտներ ընդունվել են հանրապետության տարբեր բուհեր:

Մարզպետը ներկայացրեց նաև ֆինանսական բնագավառի հիմնական ցուցանիշները` մասնավորապես նշելով, որ համայնքների բյուջեները եկամտային մասով կա¬տար¬վել են 96.9%-ով, իսկ սեփական եկամուտներն ապառքներով՝ 91.0%-ով, աճը 2015թ.-ի համեմատ կազմել է 3.8%: Փաստացի հավաքագրված սեփական եկամուտների 1671,4 մլն.դրամ ընդհանուր ծավալում հողի հարկի տեսակարար կշիռը կազմել է 26.9%, գույքահարկինը` 44,7%, վարձակալությամբ տրված գույքի վարձավճարներինը` 6.47%: Մարզպետը հավելեց, որ միայն հողի հարկի մասով 100% հավաքագրում չի ապահովվի` ցրտահարությամբ և կարկտահարությամբ պայմանավորված:

Մարզպետը խոսեց նաև արտաքին կապերի և մարզում նախատեսվող ներդրումային ծրագրերի մասին` նշելով, որ այս առումով բավականին աշխատանքներ են տարվել: Նա ներկայացրեց Ռուսաստանի դաշնության Վոլոգդայի մարզի և Սլովակիայի Հանրապետության Տռնավայի ինքնավար մարզի հետ ունեցած համագործակցության շրջանակներում ձեռք բերված պայմանավորվածություններն ու դրանք ընդլայնելու հեռանկարները:

Մարզպետ Աշոտ Ղահրամանյանն այլ ոլորտների վերաբերյալ ևս տեղեկություններ ներկայացրեց, անդրադարձավ ներմարզային խնդիրներին, դրանց լուծման հնարավոր ուղիներին` ընդգծելով, որ անելիքներ բոլոր ոլորտներում էլ դեռ կան և դրանք լուծում կստանան ըստ առաջնայնության:

Մարզպետը պատասխանեց նաև լրագրողներին հետաքրքրող հարցերին և շնորհակալություն հայտնեց նրանց` անաչառ լրատվություն ապահովելու համար: