Տեղեկատվական կենտրոն
Նորություններ
Մեկնարկել է «Մանկական գրքի շաբաթ» ամենամյա միջոցառումը
03.04.2018
Այսօր մեկնարկել է «Մանկական գրքի շաբաթ» ամենամյա միջոցառումը, որն իրականացվում է Հայստանի գրողների միության նախաձեռնությամբ: Միջոցառման մեկնարկն ազդարարվել է Արմավիրի մարզում, որի շրջանակում մարզպետարանը հյուրընկալել է ՀԳՄ նախագահ Էդուարդ Միլիտոնյանին, միության Արմավիրի մասնաճյուղի նախագահ Ռաֆայել Սահակյանին, մի խումբ գրողների և մարզի դպրոցները ներկայացնող տարրական դասարանների աշակերտների:
Ողջունելով ներկաներին` մարզպետ Աշոտ Ղահրամանյանը կարևորել է միջոցառման գաղափարը` այն համարելով հաճելի իրադարձություն հատկապես մանկական գրականության հեղինակների և իրենց իսկ լսարանի` երեխաների շրջանում: Նա իր խոսքում կոչ է արել դպրոցականներին հնարավորինս լավ սովորել և երկրի համար գրագետ քաղաքացի մեծանալ` միաժամանակ վստահեցնելով, որ պետության կողմից արվում է հնարավորը` երեխաների համար լուսավոր ապագա կերտելու նպատակով:
Միջոցառման շրջանակում ներկաներին ողջունել և իրենց ստեղծագործություններից են ընթերցել ՀԳՄ նախագահ Էդուարդ Միլիտոնյանը, մանկագիր Սուրեն Մուրադյանը: Աշակերտները ևս հանդես են եկել ասմունքով` հիմնականում ներկայացնելով միջոցառմանը ներկա ստեղծագործողների բանաստեղծությունները: