Արմավիրի մարզպետի աշխատակազմ

Այսօր ժամը 16:00-ի սահմաններում Արմավիրի մարզի Վաղարշապատի տարածաշրջանի Աղավնատուն, Արագած, Ամբերդ, Դողս և Լեռնամերձ համայնքներում ուժեղ կարկուտ է տեղացել, որը լուրջ վնաս է հասցրել գյուղացիական տնտեսություններին:

Մարզպետ Գագիկ Միրիջանյանն այցելել է կարկուտից հատկապես մեծ վնասներ կրած Աղավնատուն և Արագած համայնքներ, տեղում ծանոթացել գյուղացիական տնտեսություններին հասցված վնասի չափերին: Մարզպետի հանձնարարությամբ գյուղատնտեսության և բնապահպանության վարչության մասնագետներից ստեղծված աշխատանքային խումբը ևս եղել է կարկտահարությունից տուժած համայնքներում՝ իրականացնելով վնասի նախնական հաշվառում:

Կարկտահարության հետևանքով տուժած համայնքների վերաբերյալ Գագիկ Միրիջանյանը համապատասխան տեղեկություն է ներկայացրել ՀՀ տարածքային կառավարման և զարգացման, ինչպես նաև գյուղատնտեսության նախարարներին:

Վաղն առավոտյան էլ մարզպետը կընդունի կարկտահարված համայնքների ղեկավարներին՝ նրանց հետ հստակեցնելու պատճառված վնասի իրական չափերը և քննարկելու փոխհատուցման հնարավոր ուղիները:

Վստահեցվում է, որ հարցն ամբողջությամբ գտնվում է պատկան մարմինների ուշադրության ներքո:

Լուսանկարները՝ hetq.am