Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Մարզպետ Գագիկ Միրիջանյանի շնորհավորական ուղերձն Անկախության տոնի առթիվ
21.09.2018
Արմավիրի մարզի հարգելի բնակիչներ, շնորհավորում եմ ձեզ և ողջ հայ ժողովրդին՝ Հայաստանի Հանրապետության անկախության հռչակման 27-րդ տարեդարձի առթիվ:
1991 թվականի սեպտեմբերի 21-ին ողջ հայ ժողովուրդը միակամ ու միաձայն ի լուր աշխարհի հայտարարեց, որ վերստանձնում է սեփական ճակատագիրը տնօրինելու պատասխանատվությունն ու պատիվը: Եվ այդ օրը դարձավ համայն հայության պատմական կենսագրության ամենակարևոր օրը, որը հայ ժողովրդի կյանքում նոր ուղի բացեց, այն է` անկախության ուղին:
Սակայն բոլորս գիտենք, որ անկախությունը նվեր չտրվեց մեր ժողովրդին, այն ձեռք բերվեց բազում դժվարությունների, պատերազմի ու մաքառումների գնով: Եվ մենք` երախտապարտ սերունդներս, չմոռանալով այդ ամենը, մեր հնարավորությունները, գիտելիքներն ու կարողությունները պետք է ծառայեցնենք իրականություն դարձած այս դարավոր երազանքի հարատևությանը:
Միայն այդ պարագայում մենք կարող ենք վստահորեն ասել, որ մեր անկախությունն այլևս անկասելի է, իսկ սեպտեմբերի 21-ը մեր ազգային հպարտության, լինելիության առհավատչյան է:
Եվս մեկ անգամ շնորհավորելով մեր ազատ ու անկախ հայրենիքի տոնը` նորանոր ձեռքբերումներ ու հաղթանակներ եմ մաղթում Հայոց աշխարհին, հավերժ փառք ու հիշատակ Հայոց ազատության համար զոհվածներին, անկոտրում կամք ու արևշատություն Հայ ժողովրդին:
Կեցցե Հայաստանի Հանրապետությունը:
