Տեղեկատվական կենտրոն
Նորություններ
Համապետական շաբաթօրյակ` մարտի 23-ին
19.03.2019
Տարածքային կառավարման և զարգացման նախարարության նախաձեռնությամբ «Մաքուր Հայաստան» ծրագրի շրջանակներում սույն թվականի մարտի 23-ին հանրապետության ողջ տարածքում կիրականացվի համապետական շաբաթօրյակ:
Արմավիրի մարզի համայնքների ղեկավարների մասնակցությամբ կազմվել է շաբաթօրյակի իրականացման գործողությունների պլան-սխեմա, որն իր մեջ ներառում է նաև քարտեզագրված աղբանոցների վերացման ուղղությամբ նախատեսվող միջոցառումները։
Բոլոր մարզային, համայնքային նշանակության կազմակերպություններին, հանրապետական գործադիր մարմինների տարածքային ստորաբաժանումներին, կրթական, առողջապահական հաստատություններին և մասնավոր ընկերություններին կոչ է արվում ակտիվ մասնակցություն ունենալ տվյալ համայնքում իրականացվող մաքրման աշխատանքներին։
Խնդրում ենք շաբաթօրյակի ընթացքում հատուկ ուշադրություն դարձնել ներքոհիշյալ հանրային տարածքների մաքրմանը և բարեկարգմանը.
• պատմամշակութային հուշարձաններ
• գերեզմանատներ
• զբոսայգիներ, պուրակներ, կանաչապատ տարածքներ
• հանրային նշանակության շենքերի տարածքներ
• աղբավայրերի շրջակայք
• միջպետական, մարզային և համայնքային նշանակության ճանապարհների հարակից տարածքներ, առվեզրեր:
«Մաքուր Հայաստան» ծրագրի շրջանակներում Արմավիրի մարզում իրականացվող միջոցառումների նպատակով ստեղծված մարզային հանձնաժողովի անդամները մարտի 23-ին կայցելեն համայնքներ` հետևելու մաքրման աշխատանքներին:
Արմավիրի մարզպետարանում նույն օրը կգործի թեժ գիծ` հետևյալ հեռախոսահամարով` (+374 93) 32 95 75: Մարզում ծրագրի ընթացքի վերաբերյալ տեղեկություն ստանալու համար կարող եք զանգահարել նաև հետևյալ հեռախոսահամարին` (+374 237) 2 76 49: