Տեղեկատվական կենտրոն
Նորություններ
Մարզպետը մասնակցել է Տոլմայի ամենամյա փառատոնին
19.05.2019
ՀՀ Արմավիրի մարզպետ Համբարձում Մաթևոսյանը «Զվարթնոց» պատմամշակութային արգելոց-թանգարանի տարածքում այսօր մասնակցել է «Հայ խոհարարական ավանդույթների զարգացման և պահպանման» ՀԿ-ի նախաձեռնությամբ և մարզպետարանի աջակցությամբ իրականացված Տոլմայի փառատոնին:
«Զվարթնոց» տաճարի տարածքում բացված 35 տաղավարներում ներկայացվել են հայկական ավանդական ուտեստի տասնյակ տեսակներ՝ պատրաստված ռեստորանային տարբեր համալիրների, հասարակական կազմակերպությունների, հանրային սննդի կետերի և անհատների կողմից: Այս տարի միջոցառմանը միացել են նաև ռազմական խոհարարները և գերմանական Կարմիր խաչի ներկայացուցիչները։
Տաղավարների ներկայացուցիչները ցուցադրել են ամենահամեղ ու ինքնատիպ տոլմա եփելու հմտությունները, իսկ պրոֆեսիոնալները պատրաստել են նաև ամենաերկար տոլման, որը կարող է ընդգրկվել Գինեսի ռեկորդների գրքում:
Մարզպետ Համբարձում Մաթևոսյանը շրջել է բացված տաղավարներով, համտեսել հայկական ավանդական ուտեստն ու բարեմաղթանքի խոսքեր հղել հայ խոհարարական ավանդույթները պահպանողներին:
Տոլմայի փառատոնն ուղեկցվել է ավանդական երգ ու պարով և ավարտվել մրցանակաբաշխությամբ: Մրցանակային տեղեր զբաղեցնելու համար տաղավարները միմյանց հետ մրցել են «Լավագույն համ», «Լավագույն տեսք» և «Լավագույն մտահաղացում» անվանակարգերում: Նշված անվանակարգերում հաղթողները պարգևատրվել են «Հայ խոհարարական ավանդույթների զարգացման և պահպանման» ՀԿ-ի կողմից: