Տեղեկատվական կենտրոն
Նորություններ
ՀՀ Արմավիրի մարզպետ Համբարձում Մաթևոսյանի շնորհավորական ուղերձը Վերջին զանգի կապակցությամբ
24.05.2019
Սիրելի շրջանավարտներ,
Լավագույն ցանկություններով շնորհավորում եմ ձեզ դպրոցական ուսումնառության ավարտն ազդարարող տոնական օրվա` Վերջին զանգի կապակցությամբ:
Այս խորհրդանշական օրը դուք միշտ հիշելու եք: Հիշելու եք սիրով, հուզմունքով, հպարտությամբ, երբեմն էլ` ափսոսանքով: Սակայն մեծ կյանք տանող ճանապարհին թող ոչինչ չընկճի ձեզ ձեր ուղին յուրովի հարթելու և արդարացիորեն առաջ ընթանալու գործում:
Լինելով մեր նորօրյա պատմության հերոսական դրվագների ոգով կրթված ու դաստիարակված սերունդ` դուք օժտված եք առավել ազատ ու անկաշկանդ մտածողությամբ և հաջողությունների հասնելու մեծ վճռականությամբ: Եվ հենց սա է դառնալու ձեր երազանքներն իրականություն դարձնելու ամենակարևոր հաղթաթուղթը:
Ես վստահ եմ, որ անկախ հասարակության մեջ ձեր զբաղեցրած դիրքից, պաշտոնից, դուք դառնալու եք մեր պետության արժանավոր զավակները` կարևոր ներդրում ունենալով նաև մարզի զարգացման և հզորացման գործում:
Սիրելի շրջանավարտներ,
Կրկին շնորհավորելով ձեզ, ձեր ծնողներին և ուսուցիչներին այս հանդիսավոր օրվա առթիվ` մաղթում եմ հաջողություններ բոլոր բարի ու նվիրական նախաձեռնություններում:
Բարի երթ դեպի նոր կյանք: