Տեղեկատվական կենտրոն
Նորություններ
Մարզպետը ծանոթացել է Էջմիածնի ծննդատանն իրականացված վերանորոգման աշխատանքներին
18.06.2019
ՀՀ Արմավիրի մարզպետ Համբարձում Մաթևոսյանն այսօր այցելել է Էջմիածնի բժշկական կենտրոն` ծանոթանալու ծննդատանն իրականացված վերանորոգման աշխատանքներին, ստեղծված պայմաններին:
ԲԿ-ի տնօրեն Լիլիթ Գասպարյանի ուղեկցությամբ մարզպետը շրջել է ծննդատան երրորդ հարկում, որտեղ վերջին մեկ տարվա ընթացքում իրականացվել են հիմնանորոգման աշխատանքներ, վերանորգվել են բժշկական սարքավորումները և ձեռք է բերվել նոր գույք:
Հիմնանորոգումն իրականացվել է ԲԿ-ի սեփական միջոցների խնայողությունների հաշվին` շուրջ 30 մլն դրամի շրջանակում: Շինաշխատանքների արդյունքում ամբողջությամբ հիմնանորոգվել է նախածնարանը, ծնարանը, վիրահատարանը, վերակենդանացման և մանկական բաժինները և յոթ հիվանդասենյակ (23 մահճակալ):
Ամփոփելով շրջայցը` մարզպետ Համբարձում Մաթևոսյանը բարձր է գնահատել իրականացված աշխատանքները` կարևորելով դրանց առաջնային նշանակությունը ծննդատան համար: Նա անդրադարձել է նաև հիվանդանոցներում պետական աջակցությամբ և մարզպետարանի նախաձեռնությամբ նախատեսվող ծրագրերին, որոնք միտված են բարելավելու բուժհաստատությունների շենքային պայմանները, մատուցվող ծառայությունների որակը և ընդհանուր սպասարկումը:
Հավելենք, որ Էջմիածնի բժշկական կենտրոնը սպասարկում է Էջմիածին քաղաքի շուրջ 46 հազար, իսկ Վաղարշապատի տարածաշրջանի համայնքներից ավելի քան 123 հազար բնակչի: ԲԿ-ի ծննդատանն էլ տարվա կտրվածքով ծնունդների թիվը հասնում է 550-ի: