Տեղեկատվական կենտրոն
Նորություններ
Ճանապարների վերանորոգումը եւ, առհասարակ, մարզում ընթացող շինաշխատանքները պետք է իրականացվեն բարձր որակով. Համբարձում Մաթեւոսյանն
05.09.2019
ՀՀ Արմավիրի մարզպետ Համբարձում Մաթեւոսյանն այսօր այցելել է Մ-5 Երեւան-Արմավիր միջպետական մայրուղու Մուսալեռ-Պտղունք ճանապարահահատված, որն այժմ վերանորոգվում է պետական բյուջեի միջոցներով:
Ընդհանուր հիմնանորոգվող հատվածը կազմում է 3,7 կմ: Ճանապարհը վերանորոգվում է «Շին պլյուս» ՍՊԸ-ի կողմից: Սկզբնական փուլում կատարվել են հին ասֆալտբետոնե ծածկի ֆրեզավորում, փոսային նորոգում, հարթեցում, իսկ այսօրվանից սկսվել են ասֆալտապատման աշխատանքները:
Համբարձում Մաթեւոսյանը վերանորոգվող ճանապարհահատվածում դիտարկել է աշխատանքների ընթացքը: Մարզպետին զեկուցվել է, որ ճանապարհի վերանորոգման աշխատանքներն ընթանում են ըստ ժամանակացույցի եւ խոչընդոտող հանգամանքների բացակայության դեպքում կավարտվեն նախատեսված ժամկետում:
Շինարարությունն իրականացնող ընկերության պատասխանատուի հետ զրույցում մարզպետը կարեւորել է պայմանագրային պարտավորությունների պատշաճ կատարումը եւ նշել, որ ընթացող աշխատանքները մշտապես գտնվելու են մարզպետարանի եւ հեղինակային հսկողություն իրականացնող կազմակերպության ուշադրության ներքո: Նա իր խոսքում ընդգծել է մարզում ընթացող ճանապարների վերանորոգման եւ, առհասարակ, շինաշխատանքների` բարձր որակով իրականացնելու կարեւորությունը:
Նշված ճանապարհահատվածի վերանորոգման աշխատանքների իրականացման ընթացքում առաջացած անհարմարությունների համար Արմավիրի մարզպետարանը հայցում է վարորդների ներողամտությունը եւ հորդորում պահպանել երթեւեկության կանոնները: