Արմավիրի մարզպետի աշխատակազմ

Արազափ համայնքում մեկնարկել են երկու խորքային հորի վերականգնման աշխատանքները. միջնաժամկետ հատվածում կլուծվի 230 հա հողատարածքի ոռոգման խնդիրը, կվերացվի կրկնակի աղակալման վտանգը:

Ծրագրի ընդհանուր բյուջեն կազմում է 28 մլն 067.23 հազ. դրամ, որից ՀՀ պետական բյուջեից տրամադրվող սուբվենցիայի չափաբաժինը 70% է ` 19 մլն 647.06 հազ. դրամ, իսկ համայնքի մասնակցությունը` 30%` 8 մլն 420.17 հազ. դրամ:

Արազափի հիմնական ջրատարը կառուցվել է 1980-ական թվականներին և նախատեսված է եղել 400 հա հողատարածքի համար: Տարիներ անց կատարվել է աղակալված հողերի աղազերծում և մշակովի հողատարածքներն ավելացել են 500 հա-ով` դառնալով 900 հա: Ավելացված հողատարածքների ոռոգումն այդ ժամանակահատվածում ապահովվել է խորքային հորերի միջոցով, որոնք հետագայում դադարել են գործել:

Սուբվենցիոն ծրագրով նախատեսված աշխատանքների շրջանակում նախատեսվում է հորերի մաքրում, լվացում էլռիֆտ եղանակով, ինչպես նաև հորերի կահավորում, որն իրենից ներկայացնում է ջրհան խողովակների տեղադրում, խորքային հորի պոմպի առկայություն` իր սարքավորումներով և էլեկտրական մասերով, խորքային հորերի ցանկապատի կառուցում, սնուցման էլեկտրասնուցման օդային գծի վերականգնում և տրանսֆորմատորային ենթակայանի տեղադրում:

Ծրագրի իրականացման նպատակն է բարելավել արազափցիների կենսակերպը` բարձրացնելով նրանց զբաղվածության մակարդակը և եկամուտները. ծրագրի արդյունքում ակնկալվող 920 մլն դրամ եկամուտը 400 շահառուի կբերի շուրջ 2.3 մլն դրամ եկամուտ:

Հավելենք, որ 230 հա հողատարածքի մշակման համար անհրաժեշտ աշխատուժի թիվը հասնում է 750-ի, այդ թվում` 200-300 հավելյալ աշխատուժ: