Տեղեկատվական կենտրոն
Նորություններ
Մարզպետը մասնակցել է Եղեգնուտ համայնքի ջրամատակարարման համակարգի բարելավման ծրագրի բացման առցանց միջոցառմանը
30.07.2020
ՀՀ Արմավիրի մարզպետ Համբարձում Մաթեւոսյանն այսօր մասնակցել է ԱՄՆ Միջազգային զարգացման գործակալության (ԱՄՆ ՄԶԳ) «Գիտական առաջադեմ տեխնոլոգիաների օգտագործում և համագործակցություն հանուն ռեսուրսների համալիր պահպանության» (ԳԱՏՕ), ԱՄՆ ՄԶԳ «Ջրային ռեսուրսների մասնակցային և արդյունավետ օգտագործում» ծրագրերի և Արմավիրի մարզի Եղեգնուտ համայնքի հետ համատեղ իրականացված համայնքի ջրամատակարարման համակարգի բարելավման ծրագրի բացման առցանց միջոցառմանը:
Ողջունելով ԱՄՆ ՄԶԳ հայաստանյան առաքելության տնօրեն Դեբորա Գրիսերին և առցանց միջոցառման շուրջ 30 մասնակիցներին` Համբարձում Մաթևոսյանը կարևորել է Արմավիրի մարզում ենթակառուցվածքների բարելավմանն ու զարգացմանն ուղղված բազմապրոֆիլ միջոցառումների իրականացման գործում միջազգային գործընկեր կազմակերպությունների մասնակցությունն ու արդյունավետ համագործակցությունը` այդ համատեքստում որպես լավագույն օրինակ առանձնացնելով Առատաշեն և Եղեգնուտ համայնքներում ԳԱՏՕ ծրագրի շրջանակում իրականացված ջրամատակարարման համակարգերի բարելավման ծրագրերը:
Մասնավորապես անդրադառնալով Եղեգնուտ համայնքում իրականացված աշխատանքներին` նա ուրախությամբ նշել է, որ, ծրագրով պայմանավորված ընթացիկ խնդիրները բարեհաջող հաղթահարելով, այսօր Եղեգնուտ համայնքի 470 տնտեսություն ապահովվել է շուրջօրյա որակյալ ջրամատակարարմամբ: Մարզպետն անձամբ իր և համայնքի բնակչության անունից խորին շնորհակալություն է հայտնել ԱՄՆ Միջազգային զարգացման գործակալությանը և աջակից կողմերին` հույս հայտնելով, որ նախնական պայմանավորվածության արդյունքում ծրագիրը հաջող շարունակություն կունենա նաև մարզի մյուս համայնքներում:
Ամփոփելով իր խոսքը` Համբարձում Մաթևոսյանը ներկայացրել է վերջին երկու տարում Արմավիրի մարզի ոռոգման համակարգերի արդիականցմանն ուղղված 50 և խմելու ջրամատակարարման համակարգերի բարելավմանն ուղղված 23 ծրագրով արձանագրված և սպասվող արդյունքները` մեկ անգամ ևս ընդգծելով գործընկերների և ճիշտ համագործակցության կարևորությունը:
Առցանց միջոցառումը եզրափակվել է ծրագրի իրականացման և արդյունքների վերաբերյալ տեսանյութի ցուցադրությամբ: