Տեղեկատվական կենտրոն
Նորություններ
Փարաքար համայնքում գոյություն ունեցող կեղտաջրերի մաքրման կայանը կվերակառուցվի
14.08.2020
Փարաքար համայնքում գոյություն ունեցող կեղտաջրերի մաքրման կայանը կվերակառուցվի համայնքների սոցիալ-տնտեսական ենթակառուցվածքների զարգացմանն ուղղված սուբվենցիոն ծրագրի շրջանակում:
Ծրագրի ընդհանուր բյուջեն կկազմի 77 մլն 455.46 հազ. դրամ, որից ՀՀ պետական բյուջեից տրամադրվող սուբվենցիայի չափաբաժինը 55 % է` 42 մլն 600.503 հազ. դրամ, իսկ համայնքի մասնակցությունը` 45 %` 34 մլն 854.957 հազ. դրամ:
Մաքրման կայանի վերագործարկումը հնարավորություն կտա ապահովել համայնքի Թաիրով բնակավայրի բազմաբնակարան բնակելի շենքերի բոլոր 337 բնակարանների և ավելի քան 170 բնակելի տների կոյուղաջրերի անխափան հեռացումը:
Ծրագրի իրականացմամբ համայնքի կոյուղատար համակարգով ապահովված լինելու ցուցանիշը կավելանա 27 %-ով` 39.25-ից դառնալով 66.25: Բացի այդ, ամբողջ համայնքում կբարելավվի սանիտարահիգիենիկ իրավիճակը, կստեղծվի առողջ միջավայր հասարակական բոլոր վայրերում: Նպաստավոր պայմաններ կստեղծվեն նաև գյուղատնտեսության զարգացման, մասնավորապես` հողագործության համար:
Կեղտաջրերի մաքրման կայանի վերագործարկման արդյունքում կստեղծվի 3 հիմնական աշխատատեղ` նվազագույնը 70 հազ. դրամ աշխատավարձով:
Հավելենք, որ համայնքում մեկնարկել է արդեն 2019 թվականին հավանության արժանացած «Կոյուղագծի կառուցում 1400գծմ, Թաիրովի Վ.Մամիկոնյան փողոցից մինչև Փարաքարի Արարատյան փողոց» սուբվենցիոն ծրագիրը՝ 56 մլն 124.9 հազ. դրամ ընդհանուր բյուջեով: Նշված գումարի 55 %-ը ՀՀ պետական բյուջեից տրամադրվող սուբվենցիայի չափաբաժինն է, իսկ 45 %-ը` համայնքի մասնակցությունը:
Ծրագրի փորձարկումը նախատեսված է 2020 թվականի դեկտեմբերի 20-ին: