Արմավիրի մարզպետի աշխատակազմ

Մեծամոր քաղաքային համայնքում մեկնարկել են երկու սուբվենցիոն ծրագրերից մեկով նախատեսված շինաշխատանքները. հիմնանորոգվում է համայնքի թիվ 35 բազմաբնակարան շենքի տանիքը:

Տանիքի վերանորոգման ծրագրի ընդհանուր բյուջեն կազմում է 27 մլն 479.1 հազ. դրամ, որից ՀՀ պետական բյուջեից տրամադրվող սուբվենցիայի չափաբաժինը և համայնքի մասնակցությունը 50% է` 13 մլն 739.55 հազարական դրամ:

Մեծամոր քաղաքի 1-ին թաղամասում գտնվող բազմաբնակարան 5 հարկանի շենքը կառուցվել և շահագործման է հանձնվել 1973-1976 թվականներին: Ծրագրով նախատեսվում է իրականացնել շուրջ 700 քմ մակերեսով հարթ տանիքների ապամոնտաժում և նոր` թեք տանիքների կառուցում:

Ծրագրի իրականացման արդյունքում քաղաքի ևս մեկ բազմաբնակարան կառույց կապահովագրվի քայքայումից, իսկ բնակիչները կունենան բարեկարգ տանիքով կացարան:

Հավելենք, որ սուբվենցիոն 2-րդ ծրագրով նախատեսված է համայնքի մի շարք փողոցների ասֆալտապատում` 2285 քմ մակերեսով: Ծրագրի բյուջեն 22 մլն 557.28 հազար դրամ է` պետություն-համայնք 45-55% համաֆինանսավորմամբ: