Արմավիրի մարզպետի աշխատակազմ

Հայաստանի Հանրապետության նախագահ Սերժ Սարգսյանն այսօր Արմավիրի մարզ կատարած աշխատանքային այցի շրջանակում մասնակցեց Այգեկ համայնքի նորակառույց միջնակարգ դպրոցի բացման հանդիսավոր արարողությանը: Դպրոցն անվանակոչվել է ազատամարտիկ Մուշեղ Մովսիսյանի անունով, ով ծնունդով այգեկցի է:

Միջոցառմանը ներկա էին նաեւ Հայաստանի Հանրապետության տարածքային կառավարման նախարար, փոխվարչապետ Արմեն Գեւորգյանը, կրթության եւ գիտության նախարար Արմեն Աշոտյանը, Արմավիրի մարզպետ Աշոտ Ղահրամանյանը եւ մի շարք բարձրաստիճան պաշտոնյաներ, հյուրեր:

Բարձրաստիճան պաշտոնյաները` նախագահի գլխավորությամբ, շրջեցին դպրոցում, ծանոթացան կատարված աշխատանքներին, աշակերտների համար ստեղծված պայմաններին:

Նշենք, որ Այգեկի դպրոցի կառուցումն սկսվել է 2007 թվականին` պետական բյուջեի միջոցների հաշվին, սակայն դպրոցի արտաքին եւ ներքին հարդարման աշխատանքներն իրականացվել են մոսկվաբնակ բարերար Ռուբեն Մանուկյանի օժանդակությամբ: Մ. Մովսիսյանի անվան միջնական դպրոց կհաճախի 183 աշակերտ:

Այնուհետեւ Նախագահ Սերժ Սարգսյանն այցելեց Արեւաշատ համայնքում գտնվող <<Արաքս թռչնաֆաբրիկա>> ՓԲԸ, որտեղ արտադրական հզորությունների ավելացման նպատակով կառուցվում է մսատու թռչնի մայրական հոտի աճեցման եւ պահպանման համալիր, իսկ ս.թ. մարտին արդեն շահագործման է հանձնվել <<Արաքս թռչնաֆաբրիկա>> ՓԲԸ-ի նոր կիսաֆաբրիկատների արտադրամասը:

Հանրապետության ղեկավարը եղավ նաեւ Էջմիածնի <<Բիգա>> եւ <<Ամստեր Ֆլաուերս>> հայ -հոլանդական համատեղ ձեռնարկությունում, ծանոթացավ արտադրությանն ու աշխատանքային պայմաններին: <<Բիգա>> ընկերությունը հիմնադրվել է 2005 թվականին եւ զբաղվում է բարձրորակ սունկի արտադրությամբ: Ընկերությունում օրական հավաքվում է 900-1000 կգ շամպինյոն:

Նշենք, որ ընկերությունը առաջիկայում նախատեսում է ընդլայնել արտադրության ծավալները, կառուցել նոր ջերմոցներ` լոլիկի, վարունգի եւ պղպեղի աճեցում կազմակերպելու նպատակով: Այդ կապակցությամբ 2010թվականի դեկտեբերի 21-ին <<Ամստեր Ֆլաուերս>> ընկերությունը պայմանագիր է կնքել հոլանդական <<Ամմերլաան Քոնսթրաքշն>> ընկերության հետ: Նախատեսվում է նաեւ մասնագետների վերապատրաստում:

Նշենք նաեւ, որ <<Ամստեր Ֆլաուերս>> հայ- հոլանդական ընկերությունը հիմնադրվել է 2006 թվականին: Ընկերության հիմնական նպատակը Հայաստանում ֆիտոդիզայնի եւ լանդշաֆտային դիզայնի զարգացումն է, ինչպես նաեւ Հայաստանի պայմաններին համապատասխան տնկանյութերի աճեցումն ու բազմացումը:

Արմավիրի մարզ կատարած այցի շրջանակում Հանրապետության ղեկավարը եղավ նաեւ Արմավիրի մարզի Տալվորիկ համայնքում` ներկա գտնվելով Շենիկի ինքնահոս համակարգ գործարկմանը: Նախքան ինքնահոս համակարգի վերականգնումը, ոռոգվել է 600 հեկտար հողատարածք, իսկ աշխատանքների ավարտից հետո ոռոգելի հողատարածքները կավելանան եւս 500 հեկտարով` ընդհանուր ոռոգելի հողատարածքները հասցնելով 1100 հեկտարի: Համաշխարհային բանկի եւ Հազարամյակի մարտահրավեր հիմնադրամ-Հայաստան ծրագրի վերջին երկու տարիների համագործակցության արդյունքում վերականգնվել են Թալինի մայր ջրանցքի առավել քայքայված հատվածներն ու կառուցվածքները, եւ ներկայումս այն հանդիսանում է Շենիկի ինքնահոս համակարգը սնուցող հիմնական ջրաղբյուրը:

Հանրապետության ղեկավարի` Արմավիրի մարզ կատարած այցի վերջին կանգառը Արաքս համայնքն էր: Արաքսում Նախագահ Սերժ Սարգսյանն այցելեց Արմավիրի մայր ջրանցքի տեղամաս, ծանոթացավ կատարված աշխատանքներին: Նշենք, որ ջրաղբյուրը Արաքս գետն է, իսկ ջրընդունիչի գլխամասային կառույցը, որը կառուցվել է ՀԲ-ի կողմից ֆինանսավորված Ոռոգման համակարգերի զարգացման ծրագրի շրջանակներում, ունի միջպետական նշանակություն:

Հավելենք, որ Արմավիրի ոռոգման համակարգի տակ ընկած հաշվարկային սպասարկման տարածքը կազմում է 23.900 հեկտար: Շուրջ 5.000 հա սեփականաշնորհված գյուղատնտեսական հողեր չէին ոռոգվում տարբեր պատճառներով, որոնցից մեկն էլ ջրի կորուստներն էին մայր ջրանցքներում: Այդ հողերից 2.300 հա հնարավոր կլինի ոռոգել հիշյալ ծրագրի շրջանակներում` Արմավիրի ոռոգման համակարգի վերականգնման աշխատանքների իրականացումից հետո: