Արմավիրի մարզպետի աշխատակազմ

Հայաստանի Հանրապետության նախագահ Սերժ Սարգսյանի մասնակցությամբ այսօր հանդիսավորությամբ բացվեց Արմավիրի մարզի Մերձավան համայնքում գտնվող ՙՊոլիմեր տրուբ՚ նորակառույց գործարանը: Հանրապետության ղեկավարը շրջեց գործարանում, ծանոթացավ աշխատաքային պայմաններին, ընկերության հեռանկարային զարգացման ծրագրերին, ըստ որոնց նախատեսվում է գործարանի ընդլայնում եւ նոր ապրանքատեսակների արտադրություն:

Գործարանի կառուցման աշխատանքներն սկվել են 2009 թվականից` Սիրիայի քաղաքացիներ Արթին եւ Սուրեն Վարդանյանների նախաձեռնությամբ: Գործարանն արդեն իսկ սկսել է արտադրել խոշոր տրամաչափի պոլիէթիլեն խողովակներ: Վերջիններիս արտադրման հումքը ներկրվում է Արաբական Միացյալ Էմիրություններից եւ Սաուդյան Արաբիայից: Ինչպես լրագրողների հետ զրույցում նշեց ՙՊոլիմեր տրուբ՚-ի գործադիր տնօրեն Արշակ Նալբանդյանը, պոլիէթիլեն խողովակների արտադրման անհրաժեշտությունը թելադրված է այն հանգամանքով, որ սկսած 1990 թվականից` խոշոր տրամաչափի խողովակներ Հայաստանում չեն ներկրվել` չնայած տնտեսության որոշակի ճյուղերում դրանց մեծ պահանջարկին:

Արտադրված խողովակները կարող են օգտագործվել հիդրոէներգետիկայի, ոռոգման, կոյուղու եւ ջրահեռացման համակարգերում: Ըստ նախնական մոնիտորինգի` խոշոր տրամաչափի խողովակների տարեկան պահանջարկը հանրապետությունում կազմում է 80-120 կմ, որը, Ա. Նալբանդյանի վստահեցմամբ, գործարանն ունակ է ամբողջովին բավարարելու: Արտադրվող խողովակների տրամաչափերն են` 800, 1100, 1200 եւ 1400 մմ: Ըստ Ա. Նալբանդյանի` նմանատիպ խողովակների գործածության երաշխիքային ժամկետը 50 տարի է:

Պայմանագրային հիմունքներով տարբեր շինարարական կազմակերպությունների հետ համագործակցելով` գործարանի կառուցման ժամանակահատվածում աշխատել են 155 շինարար: Ներկայում գործարանում մշտական աշխատանքի են ընդունված 32 մասնագետ եւ 12 տեխնիկական աշխատող, որոնց միջին աշխատավարձը 200 հազար դրամ է: Առաջիկայում նախատեսվում է գործարանի ընդլայնում եւ նոր ապրանքատեսակների արտադրություն: Գործարանում ներդրումների ծավալը կազմել է 5,8 մլն դոլար: