Արմավիրի մարզպետի աշխատակազմ

ՀՀ գյուղատնտեսության նախարար Սերգո Կարապետյանը եւ ՀՀ Արմավիրի մարզպետ Աշոտ Ղահրամանյանն այսօր Արմավիրի մարզպետարանում հանդիպեցին մարզում խաղող մթերող ընկերությունների ղեկավարների հետ:

Ողջունելով ներկաների` մարզպետ Աշոտ Ղահրամանյանը նշեց, որ հանդիպման նպատակն է մինչ խաղողի մթերման գործընթացի մեկնարկը հստակեցնել համապատասխան ընկերություննների կողմից նախատեսվող խաղողի մթերման ծավալը, գինը, վճարման կարգը` գործընթացում հնարավոր խնդիրները բացառելու եւ գյուղացու բերքի մթերումը ժամանակին եւ նորմալ պայմաներում կազմակերպելու համար:

Գյուղատնտեսության նախարարն իր խոսքում կարեւորեց տնտեսվարողների եւ գյուղացիների համագործակցությունը` նշելով, որ դա պետք է դառնա աշխատանքային առօրյա, որի արդյունքում կշահի եւ տնտեսվարողը, եւ գյուղացին:

Նախարարն անդրադարձավ նաեւ պայմանագրերի կնքման անհրաժեշտությանը` հույս հայտնելով, որ եթե ոչ այս տարի, ապա հաջորդ տարի պետք է հասնել նրան, որ բոլոր տնտեսվարողները, վերամշակողները կարողանան ունենալ իրենց նախնական գնահատականները մթերվող բերքի քանակի վերաբերյալ եւ ըստ այդմ` ունենան պայմանագրեր, որոնցում ամրագրված կլինի մթերվող բերքի ծավալը, օպտիմալ գինը եւ վճարման կարգը:

Անդրադառնալով խաղողի մթերման գործընթացին` Ս. Կարապետյանը նշեց, որ նախորդ տարի մարզում մթերման է հանձնվել շուրջ 47.8 հազ. տոննա խաղող, որից 33.6 հազ. տոննան մարզի վերամշակող ընկերություններում, իսկ 14.2 հազ. տոննան այլ ընկերություններում:

Համաձայն մարզի վերամշակող ընկերությունների ներկայացրած տեղեկության` վերջիններիս կողմից այս տարվա խաղողի մթերման կանխատեսվող ծավալը կազմում է շուրջ 23.8 հազար տոննա` առանց <<Երեւանի գինու, կոնյակի, օղու կոմբինատ>> ԲԲԸ-ի եւ <<Գրեյթ-Վելլի>> ՀՁ ՍՊԸ-ի արմավիրյան մասնաճյուղերի կողմից կանխատեսվող մթերման ծավալի:

Մարզպետ Ա. Ղահրամանյանը հավաստիացրեց, որ գյուղացու ստացած բերքն ամբողջությամբ կիրացվի եւ հավելեց, որ այդ ուղղությամբ արդեն համապատասխան աշխատանքներ են տարվում:

Գյուղատնտեսության նախարարի փոխանցամբ խաղողն այս տարի մթերվելու է 120-130 դրամ արժողությամբ: