Արմավիրի մարզպետի աշխատակազմ

Մարզպետ Աշոտ Ղահրամանյանն այսօր ընդունեց Գերմանիայի Դաշնային Հանրապետության Հալե քաղաքի Հանս Քրիստիան Ռայլի անվան գիմնազիայի պատվիրակությանը, որը գլխավորում էր գիմնազիայի տնօրեն Միխայել Գյոթցը: Ընդունելությանը ներկա էին նաեւ ՀՀ Արմավիրի մարզպետարանի աշխատակազմի կրթության, մշակույթի եւ սպորտի վարչության պետ Գայանե Սայադյանը եւ Սարդարապատ համայնքի միջնակարգ դպրոցի տնօրեն Անահիտ Մանուկյանը:

Հանս Քրիստիան Ռայլի անվան գիմնազիան արդեն երեք տարի է, ինչ համագործակցում է Արմավիրի մարզի Սարդարապատ համայնքի միջնակարգ դպրոցի հետ: Համագործակցության շրջանակներում երեք տարի շարունակ կազմակերպվում են մեկշաբաթյա փոխայցելություններ, որոնք կրում են ճանաչողական բնույթ եւ նպաստում են ձեւավորված հարաբերությունների ամրապնդմանն ու զարգացմանը: Փոխայցելությունների ընթացքում երեխաները բնակվում են իրենց հասակակիցների ընտանիքներում` այդպիսով առավել մոտիկից հաղորդակից դառնալով ազգային ավանդույթներին, սովորույթներին, կենցաղավարության կանոններին ու բարքերին:

Մարզպետ Աշոտ Ղահրամանյանը բարձր գնահատեց երկու կրթօջակների միջեւ ձեւավորված հարաբերությունները` նշելով, որ դրանք երկուստեք սովորելու, իրենց պատկերացումները երկու պետությունների մասին ընդլայնելու եւ բարեկամական ջերմ հարաբերություններ ձեւավորելու հրաշալի առիթ են: Մարզպետն իր խոսքում անդրադարձավ նաեւ Հայաստանում պետական մակարդակով կրթության համակարգին ցուցաբերվող ուշադրությանը` ընդգծելով, որ տարեց-տարի բարելավվում են կրթական ծրագրերն ու ուսումնառության պայմանները: Հյուրերին ամփոփ տեղեկություն ներկայացվեց նաեւ մարզի առանձնահատկությունների եւ կրթօջախների մասին: <<Գերմանիան ինձ համար դասվում է աշխարհի այն տասը պետություններ թվին, որոնք առանձնանում են պատմական հարուստ նկարագրով ու մշակույթով, առաջադեմ ու ժողովրդավարական հայացքներով: Այդ ամենով հանդերձ ես ուրախ եմ Ձեզ հյուրընկալելու եւ այս կարճ, բայց կարեւոր ժամանակաը Ձեզ հետ անցկացնելու համար>>,- ամփոփելով իր խոսքը` նշեց մարզպետ Աշոտ Ղահրամանյանը:

Շնորհակալություն հայտնելով մարզպետին ջերմ հյուրընկալության համար` պատվիրակության ղեկավարը նշեց, որ անչափ տպավորված են վերադառնալու Գերմանիա` իրենց հետ տանելով վառ հիշողություններ հայ ժողովրդի պատմության, հոգատար վերաբերմունքի եւ հյուրասիրությանաի մասին: Միխայել Գյոթցը խոսեց երկու կրթօջախների համագործակցության հետագա ամրապնդման եւ ընդլայնման հարցերի շուրջ: Նա նշեց նաեւ, որ Սարդարապատի դպրոցի օրինակով իսկապես ակնհայտ է դառնում ոլորտին ցուցաբերվող ուշադրությունն ու հոգածությունը:

Պատվիրակության անդամները հանդիպման վերջում մարզպետին հանձնեցին ծրար, որում ամփոփված էր նրանց ծնողների շնորհակալական խոսքերն ու ստորագրությունները` իրենց զավակներին ցուցաբերած ջերմ ընդունելության համար:
Մարզպետը եւս նվերներ հանձնեց պատվիրակության անդամներին: