Արմավիրի մարզպետի աշխատակազմ

Այսօր տեղի ունեցավ Երասխահուն համայնքի միջնակարգ դպրոցի անվանակոչման հանդիսավոր արարողությունը, որին ներկա էին նաեւ ՀՀ փոխվարչապետ, տարածքային կառավարման նախարար Արմեն Գեւորգյանը եւ ՀՀ Արմավիրի մարզպետ Աշոտ Ղահրամանյանը:

Դպրոցն անվանակոչվել է ՀՀ Արմավիրի մարզպետ Աշոտ Ղահրամանյանի որոշմամբ, որի համար հիմք է հանդիսացել Երասխահուն համայնքի միջնակարգ դպրոցի մանկավարժական խորհրդի 2011 թվականի օգոստոսի 22-ի որոշմամբ ՀՀ Արմավիրի մարզպետին ուղղված ուղերձը` դպրոցը նույն համայնքից Արցախյան հերոսամարտի մասնակից, զոհված ազատամարտիկ Մարտիկ Գեւորգյանի 60-ամյա հոբելյանի կապակցությամբ նրա անվամբ անվանակոչելու վերաբերյալ:

Oրը խորհրդանշվեց նաեւ դպրոցի բակում  Մարտիկ Գեւորգյանի կիսանդրու բացմամբ, որը դպրոցի մուտքի առջեւ ռազմահայրենասիրական դաստիարակության բաց դասարան կդառնա եւ Արցախյան ազատամարտի դասերը կփոխանցի տարբեր սերունդների: Կիսանդրու բացման պատիվը վերապահվեց մարզպետ Աշոտ Ղահրամանյանին եւ Մարտիկ Գեւորգյանի որդուն: Միջոցառման մասնակիցները ծաղիկներ եւ ծաղկեպսակներ դրեցին ազատամարտիկի կիսանդրուն եւ գլուխ խոնարհեցին նրա հիշատակի առջեւ:

Շնորհավորելով ներկաներին օրվա կապակցությամբ` մարզպետ Ա. Ղահրամանյանը մասնավորապես ասաց.

-Արցախյան հաղթանակները կերտվել են Մարտիկի նման հայկազունների անձնազոհությամբ ու հերոսությամբ: Ապրելով խաղաղ երկնքի տակ` մենք պարտավոր ենք վառ պահել նրանց հիշատակն ու պահպանել նրանց այրամբ ձեռք բերված հաջողությունները: Այսօր Մարտիկն իր քարեղեն ներկայությամբ նոր շունչ հաղորդեց Երասխահուն համայնքին եւ հավերժեց իր ներկայությունն իր իսկ ծննդավայրի կրթօջախում: Հավերժ փառք մեր քաջարի մարտիկներին:

Օրվա առիթիվ ռազմահայրենասիրական երգերով, բանաստեղծություններով եւ պարային համարներով հանդես եկան այժմ արդեն Երասխահուն համայնքի Մարտիկ Գեւորգյանի անվան միջնակարգ դպրոցի աշակերտները: