Արմավիրի մարզպետի աշխատակազմ

Այսօր տեղի ունեցավ մարզպետ Աշոտ Ղահրամանյանի 2011 թվականի ամփոփիչ մամուլի ասուլիսը, որի ընթացքում նա ներկայացրեց անցնող տարում իրականացված հիմնական աշխատանքները և 2012 թվականին նախատեսված ծրագրերը:

Ըստ մարզպետի` 2011 թվականը մարզի համար հաջողված է եղել: Միայն գյուղատնտեսության ոլորտում նախորդ տարվա համեմատությամբ գրանցվել է արտադրանքի 117.6 տոկոսի աճ, և վերամշակող ձեռնարկությունների կողմից մթերման ծավալի 100 տոկոսի ավելացում: Մարզում արտադրված համախառն բերքը 2011 թվականին կազմել է շուրջ 7 հազար տոննա, նախորդ տարվա 5 հազար 900 տոննայի դիմաց: Իսկ գյուղատնտեսական արտադրության մեջ լրացուցիչ ներգրավվել է 301.7 հեկտար հողատարածք:

Գյուղացու բերքը տարերային աղետներից ամբողջությամբ պաշտպանելու համար մարզպետ Աշոտ Ղահրամանյանի տեղեկացմամբ` մարզում տեղակայված 72 հակակարկտային կայանների թվին 2012 թվականին կավելանա ևս 22-ը: Իսկ մարզում աճեցված գյուղատնտեսական մթերքների իրացմանը կխթանի Վանանդ համայնքում կառուցվելիք վերամշակող ձեռնարկությունը, որի սեփականատերը պատրաստակամություն է  հայտնել գյուղացիական տնտեսություններից ընդունելու մեծ քանակությամբ գյուղմթերք:

Նա տեղեկացրեց նաև, որ 2012 թվականին պետական աջակցությամբ գյուղացիական տնտեսություններին մատչելի պայմաններով կհատկացվի դիզվառելիք, պարարտանյութ և բարձրորակ սերմացու:

Մարզպետը նշեց, որ միայն 2011 թվականին մարզում բոլոր աղբյուրներով իրականացվել են շուրջ 16.2 մլրդ դրամի ֆինանսական ներդրումներ, որից` 54.76 տոկոսը /8 874 788.2 հազար դրամ/ գյուղատնտեսության ոլորտում, 19.6 տոկոսը /3 176 530.2 հազար դրամ/ կրթության ոլորտում, 18.76 տոկոսը /3 040 160.8 հազար դրամ/ քաղաքաշինության ոլորտում, 4.42 տոկոսը /716 645.5 հազար դրամ/ ջրամատակարարման ոլորտու, 0.92 տոկոսը /148 313.3 հազար դրամ/ ճանապարհաշինության ոլորտում, 0.73 տոկոսը /118 770.8/ մշակույթի ոլորտում, 0.25 տոկոսը /40 863.0 հազար դրամ/ սոցիալական ոլորտում, 0.24 տոկոսը /38 350.0 հազար դրամ/ գազամատակարարման ոլորտում, 0.16 տոկոսը /25 426.8 հազար դրամ/ էներգետիկայի ոլորտում, 09 տոկոսը /15 000.0 հազար դրամ/ առողջապահության ոլորտում, 0.06 տոկոսը /9512.2 հազար դրամ/ սպորտի ոլորտում և 0.02 տոկոսը /3 710.0 հազար դրամ/ բնապահպանության ոլորտում:

Մարզպետ Աշոտ Ղահրամանյանն անդրադարձավ նաև տեղական ինքնակառավարման մարմինների գործունեությանը, և առանձնացնելով մի շարք հաջողություններ` փաստեց, որ նրանց աշխատանքների որակը վերջին տարիներին միանգամայն բարելավվել է:

Նա ամփոփ ներկայացրեց նաև 2012 թվականին մարզում տարբեր ուղղություններով նախատեսվող ծրագրերը: