Արմավիրի մարզպետի աշխատակազմ

Մարզպետ Աշոտ Ղահրամանյանն այսօր ընդունեց Ռուսաստանի Դաշնության Մոսկվայի մարզի կառավարության արտաքին տնտեսական կապերի նախարարության արտաքին տնտեսական համագործակցության վարչության պետ Յուլիա Ռուդիխին և նույն մարզի Մետիչինսկի շրջանի ղեկավարի առաջին տեղակալ Անդրեյ Չուրակովին: Պատվիրակներն Արմավիրում էին Հայաստանի Հանրապետոթյան և Ռուսաստանի Դաշնության Մոսկվայի մարզի կառավարությունների միջև ձևավորված միջպետական համագործակցության շրջանակներում:

Մարզպետ Աշոտ Ղահրամանյանը ողջունեց նրանց այցն Արմավիրի մարզ` ընդգծելով, որ բարձր է գնահատում հայ-ռուսական միջտարածաշրջանային համագործակցության ակտիվացմանն ուղղված տարրաբնույթ ձեռնարկների իրականացումը, որոնք միտված են երկու եղբայրական պետությունների դարերից եկող հարաբերությունների առավել ամրապնդմանն ու զարգացմանը: Այդ համատեքստում նա անդրադարձավ նաև Արմավիրի մարզի և ՌԴ Յարոսլավի ինչպես նաև Սվերդլովսկի մարզերի միջև ձևավորված հարաբերություններին, կողմերի միջև իրականացվող ծրագրերին: <<Մարզի զարգացման գերակա ուղղություն ենք համարում գյուղատնտեսությունը: Այս ոլորտում տարբեր մակարդակներով լուրջ աշխատանքներ են տարվում անհրաժեշտ ենթակառուցվածքների ստեղծման և դրանով իսկ գյուղացուն աջակցելու և գյուղատնտեսությունը զարգացնելու ուղղությամբ>>,-մատնանշելով ոլորտում ունեցած ձեռքբերումներն ու նախատեսվող ծրագրերը` ասաց մարզպետ Ղահրամանյանը:

<<Միանգամայն նկատելի է, որ Հայստանում այժմ լուրջ գումարներ են ուղղվում ենթակառուցվածքների զարգացմանը: Չենք կարող չնկատել նաև ապրանքաշրջանառության անհամեմատ աճը և այն դրական տեղաշարժերը, որոնք վերջին տարիներին գրանցվել են տարբեր ոլորտներում>>,-խոսելով հայստանյան տպավորությունների մասին` նշեց Անդրեյ Չուրակովը:

Յուլիա Ռուդիխը մարզպետ Աշոտ Ղահրամանյանին փոխանցեց Մոսկվայի մարզի արտաքին տնտեսական կապերի նախարար Տիգրան Կարախանովի ողջույնի ու բարեմաղթանքի խոսքերը, և մարզի կառավարության անունից մարզպետին շնորհավորեց հայ-ռուսական դիվանագիտական հարաբերությունների հաստատման 20-ամյակի կապակցությամբ` միաժամանակ նրան հանձնելով Մոսկվայի մարզի արտաքին տնտեսական կապերի նախարարի շնորհավորական նամակը:

Այնուհետև մարզպետ Աշոտ Ղահրամանյանի ուղեկցությամբ Մոսկվայի մարզի պատվիրակներն այցելեցին Արմավիր քաղաքի թիվ 5 հիմնական դպրոց, որտեղ նրանց միացան նաև Հայաստանում "Ռոսսոտրուդնիչեստվո" դաշնային գործակալության ներկայացուցչության ղեկավար, ՌԴ դեսպանության խորհրդական Վիկտոր Կրիվոպուսկովը, Արմավիրի մարզում տեղակայված սահմանապահ զորքերի հրամանատարը, Արմավիրի քաղաքապետն ու մի շարք բարձրաստիճան պաշտոնյաներ: Դպրոցում նրանց դիմավորեցին աղ ու հացով, երկու ժողովուրդների բարեկամությունը խորհրդանշող երգերով:

ՌԴ Մոսկվայի մարզի պատվիրակները դպրոցի ռուսական ուսուցմամբ դասարաններին նվիրաբերեցին տարբեր առարկաների  համար նախատեսված ուսումնական գրականություն և դիդակտիկ նյութեր:

Նշենք, որ մինչ այս ևս դպրոցը Մոսկվայի մարզի կառավարությունից ստացել է տարաբնույթ գրականություն, լաբորատոր սարքավորումներ , ինչպես նաև համակարգչային տեխնիկա, իսկ դպրոցի թվով 20 աշակերտներ, ռուսաց լեզվի ուսուցչուհու հետ միասին 2011 թվականի դեկտեմբերի 25-ից մինչև 2012 թվականի հունվարի 10-ը հյուրընկալվել են Մոսկվայի մարզում` արժանանալով բարձր ընդունելության: