Արմավիրի մարզպետի աշխատակազմ

Սիրելի’ ուսուցիչներ, մեր պայծառ սերնդի ազգային ոգին կերտող, կրթության ու դաստիարակության գործի լուսավոր մշակներ, շնորհավորում եմ Ձեզ` Ձեր ավանդական տոնի` Ուսուցչի օրվա կապակցությամբ:

Այսօր մեր ժողովուրդն իր նվիրումի ու երախտագիտության խոսքն է ուղղում Ձեզ, իր իմաստնության բարձունքից բարության ու բերկրանքի լուսապսակով է զարդարում Ձեր անունը` փառաբանելով ուսուցչի ազնվագույն վաստակն ու բարի գործը:
Իսկապես, ուսուցչի համար չկա ավելի թանկ բան, քան այն, որ նա ձգտում է տքնանքով և համառությամբ հասնել իր գերագույն նպատակին` նվաճելով մասնագիտորեն և ճակատագրով իրեն վիճակված ոգեղենի բարձունքը: Մարդկային հազարամյա պատմության մեջ բառացիորեն ամենաազնիվ նվաճումն այն է, որը դառնում է մտքի և հոգու արարման խորհրդանիշ:

Ի սկզբանե հենց դրան են խարսխված կրթության ու գիտության վերընթացի հոգեմերձ գաղափարները: Դրանք ուղղորդում են դեպի նոր հորիզոններ` միավորելով սերունդների հարընթաց կապը, պահում և պահպանում են անցյալի մեր հարուստ ժառանգությունը:

Դպրության գործի սիրելի’ նվիրյալներ, մեծարգո’ ուսուցիչներ և ուսուցչուհիներ, շնորհակալություն Ձեզ, որ Դուք բարդ ու բովանդակ մեր կյանքում լույս, հավատ ու ներշնչանք պարգևող իմաստասերներ եք: Մեր հանրությունը, մենք բոլորս հպարտ ենք ձեզանով, որ Դուք թանկ գնով ձեռք բերված անկախ Հայաստանի հզոր գաղափարների կրողն ու փոխանցողն եք, նաև նրա դժվարին օրերի հավատարիմ զինակիցը և մեծ նպատակների ու հայրենասիրության վստահելի ջահակիրը:

Այսօր մեր երկրի, մեր պետության և նրա ղեկավարության ուշադրության կենտրոնում են դպրոցը, ուսուցիչն ու աշակերտությունը: Եվ դա արվում է աննախադեպ մեծ ու բազմաբովանդակ ծրագրերով` հայացքը դեպի ապագա:

Փառք ու պատիվ Ձեզ կրթության բազմաշերտ ոլորտում աշխատող ուսուցիչ-դաստիարակներ, կրկին շնորհավորելով մասնագիտական և ավանդական տոնի առթիվ` մաղթում եմ Ձեզ անձնական երջանկություն, ոգու և կամքի արիություն, ստեղծագործական աշխատանքի նոր եռանդ, մեծ համբերություն և բազում հաջողություններ:
 

ՀՀ Արմավիրի մարզպետ Աշոտ Ղահրամանյան