Արմավիրի մարզպետի աշխատակազմ

ՀՀ Արմավիրի մարզպետ Աշոտ Ղահրամանյանն այսօր Գետաշեն համայնքի միջնակարգ դպրոցում մասնակցեց բաց երկնքի տակ թանգարանի բացմանը, որն այսուհետ հանդիսանալու է մշակութային արժեքները ներկայացնելու վայր:

Նախաձեռնության հեղինակը դպրոցի պատմության ուսուցիչ Գևորգ Արզումանյանն է, ում նախաձեռնությամբ հավաքագրվել են տարբեր դարաշրջանների թվագրված կավե և երկաթե իրեր` կճուճներ, կարասներ, պղնձե կաթսաներ: Թանգարանում ներկայացված էին Քրիստոսից առաջ 7-րդ դարից մինչև նախորդ դարասկզբին թվագրված իրեր, որոնցից ամենահինը Արաքս գետից հայտնաբերված սուրն է` թվագրված Ք.ա. 7-րդ դար: Այն հայտնաբերել են գյուղացիները` 1990 թվականին:

Մարզպետ Աշոտ Ղահրամանյանը կրթօջախի տնօրենի ուղեկցությամբ շրջեց թանգարանում, ծանոթացավ ցուցադրված իրերին և ողջունեց թանգարանի բացման գաղափարը` այն իր տեսակի մեջ որակելով եզակի և հետաքրքրական` բոլոր տարիքային խմբերի համար:

Թանգարանի բացման կապակցությամբ դպրոցի երկրորդ դասարանի աշակերտների մասնակցությամբ ներկայացվեց համերգ–բեմադրություն, որի առանցքը հնագույն հայկական օջախն էր, նիստ ու կացը, զբաղմունքը: