Արմավիրի մարզպետի աշխատակազմ

Աշխատանքային երկօրյա այցով Իրանի Իսլամական Հանրապետության   Արևելյան Ազարբայջանի նահանգում էր ՀՀ Արմավիրի մարզպետ Աշոտ Ղահրամանյանի գլխավորած պատվիրակությունը, որի կազմում էին` փոխմարզպետ Դավիթ Սամսոնյանը, մարզպետարանի աշխատակազմի իրավաբանական բաժնի պետ Յուրի Մանվելյանը և Հայկական «Բարվա» ընկերության նախագահ Արամ Վարդանյանը:

Այցի շրջանակում պատվիրակությունը եղել է Ջուլֆա գավառի «Արազ» առևտրատնտեսական ազատ գոտում, որտեղ քննարկվել են ազատ տնտեսական գոտու հետ համագործակցության հեռանկարներին առնչվող հարցեր:

Մարզպետի գլխավորած պատվիրակությունը այցելել է նաև 8-րդ դարի հայկական կրոնական համալիր հանդիսացող Սուրբ Ստեփանոս Նախավկայի վանքը: Վանական այս համալիրը 2008 թվականին գրանցվել է ՅՈՒՆԵՍԿՕ-ի Համաշխարհային ժառանգության ցանկում։ Իսկ 2011 թվականին Իրանի Մշակութային ժառանգության կազմակերպության «Իրանի պատմական եկեղեցիների կենտրոնի» պատասխանատու տնօրեն, ճարտարապետ Շերլի Ավետյանի հսկողության ներքո, ինչպես նաև նշված կազմակերպության և "Արաքս" առևտրական ազատ գոտու տնօրինության ֆինանսավորմաբ և Հայաստանից հրավիրված փորձառու վարպետների ջանքերի շնորհիվ չորս ամիսների ընթացքում ավարտվել է Սուրբ Ստեփանոս Նախավկայի վանքի կիսավեր զանգակատան վերանորոգման աշխատանքը, և երկարատև լռությունից հետո նոյեմբերի 6-ին ղողանջել են պատմական վանքի զանգերն ու օրհնվել է զանգակատունը։

Հաջորդիվ Թավրիզում պատվիրակությանը հյուրընկալել է ԻԻՀ Արևելյան Ազարբայջանի նահանգապետ Ալի Ռեզա Բեյգին: Հանդիպմանը կողմերը քննարկել են առևտրատնտեսական ոլորտում համագործակցության ընդլայնմանը վերաբերող հարցեր:

Հայ-իրանական բարեկամական կապերի ամրապնդման ու ընդլայնման համատեքստում կարևորելով երկկողմ հարաբերությունների զարգացման անհրաժեշտությունը` մարզպետ Աշոտ Ղահրամանյանը ներկայացրել է փոխգործակցության համար առկա հնարավորությունները:

Հաշվի առնելով Արմավիրի մարզում, մասնավորապես գյուղատնտեսության ոլորտում, առկա հնարավորությունները և Արևելյան Ազարբայջանի գիտատեխնիկական բազան` իրանական կողմը շահագրգռվածություն է հայտնել ներդրումներն ուղղել Հայաստան և գյուղատնտեսության ոլորտում ընդլայնել երկկողմ համագործակցությունը:

Իրանի Արևելյան Ազարբայջանի նահանգապետը շեշտել է, որ Իրանն ու Հայաստանը պետք է մասնավոր ոլորտում իրենց բոլոր հնարավորություններն օգտագործեն, որպեսզի ամենաարագ ժամկետներում զարգանան երկկողմ հարաբերությունները:

Հավելենք, որ պատվիրակությունն այցելել է նաև տրակտորների արտադրությամբ զբաղվող գործարան, եղել է  պանրի արտադրամասում: