Տեղեկատվական կենտրոն
Նորություններ
Ամփոփվեցին ՀՀ Արտակագ իրավիճակների նախարարության Արմավիրի մարզային փրկարարական վարչության 2012 թվականի գործունեության արդյունքները
18.01.2013
ՀՀ Արմավիրի մարզպետարանում այսօր տեղի ունեցավ ՀՀ Արտակարգ իրավիճակների նախարարության /ԱԻՆ/ Արմավիրի մարզային փրկարարական վարչության /ՄՓՎ/ 2012 թվականի գործունեության ամփոփման հաշվետու նիստը, որին մասնակցում էին ՀՀ Արմավիրի մարզպետ Աշոտ Ղահրամանյանը, ԱԻՆ փրկարարական ծառայության տնօրենի տեղակալ, թ/ծ գեներալ-մայոր Ալիկ Պետրոսյանը, ԱԻՆ <<Հիդրոօդերևութաբանության և մոնիտորինգի պետական ծառայություն>> ՊՈԱԿ-ի տնօրեն Լևոն Վարդանյանը, մարզպետարանի և նախարարության բարձրաստիճան պաշտոնյաներ, ԱԻՆ Արմավիրի մարզային կառույցների պատասխանատուներ:
ՀՀ ԱԻՆ ՄՓՎ-ի պետ, փրկարար ծառայության փոխգնդապետ Արմեն Ամիրջանյանը զեկուցեց 2012 թվականին վարչության կողմից իրականացված աշխատանքների մասին` ընդգծելով, որ վարչության գործունեությունը հաշվետու ժամանակահատվաում ուղղված է եղել քաղաքացիական պաշտպանության համակարգի կատարելագործմանը և արտակարգ իրավիճակներում բնակչության պաշտպանության խնդիրների իրականացմանը: Ըստ նրա` ԱԻՆ Արմավիրի ՄՓՎ-ի 2012 թվականի հիմնական միջոցառութմների պլանով նախատեսված աշխատանքներն ամբողջությամբ կատարվել են:
Նշվեց, որ 2012 թվականին մարզի տարածքում գրանցվել է 506 արտակարգ դեպք /2011թ.` 516/, որոնց հետևանքով եղել է 24 զոհ /2011թ.` 8/ և տուժել է 381 մարդ /2011թ.` 264/: Արտակարգ դեպքերի աճը պայմանավորված է թունավորումների, ջրահեղձման և գրանցված ճանապարհատրանսպորտային պատահարների աճով:
Արմեն Ամիրջանյանը ներկայացրեց մարզի բնակչության պաշտպանության համակարգի օպերատիվ նախապատրաստման ուղղությամբ իրականացված աշխատանքները` շտաբային ուսումնավարժություններն ու օբյեկտային վարժանքները, որոնք ընդգրկել են ինչպես քաղաքացիական պաշտպանության ոլորտների հիմնահարցերը, այնպես էլ մարզի բնակչության պաշտպանության համակարգի օպերատիվ նախապատրաստման խնդիրնեերը:
Անդրադառնալով քաղաքացիական պաշտպանության /ՔՊ/ համակարգի նախապատրաստման ուղղությամբ իրականացված աշխատանքներին` ՀՀ ԱԻՆ ՄՓՎ-ի պետը տեղեկացրեց, որ 2012 թվականի 1-ին կիսամյակի ընթացքում ՔՊ համակարգի կատարելագործման ուղղությամբ ՄՓՎ-ի կողմից մշակվել և մարզպետ Աշոտ Ղահրամանյանի կողմից հաստատվել է <<ՀՀ Արմավիրի մարզի քաղաքացիական պաշտպանության պլանը>>: Հաշվետու տարում ավարտվել է մարզի 96 համայնքի, 118 դպրոցի, 5 բարձրագույն և միջնակարգ մասնագիտական ուսումնական հաստատության, 44 նախադպրոցական և 6 բժշկական հաստատության, 1 թանգարանի, 18 բանկային մասնաճյուղերի, 3 հեռուստաընկերության և պաշտպանական, ռազմական նշանակություն ունեցող 15 կազմակերպության ՔՊ պլանների և պլան-ժամանակացույցերի մշակումը:
Ներկայացնելով կապի և ազդարարման համակարգի առանձնահատկությունները` Արմեն Ամիրջանյանը մասնավորապես ընդգծեց, որ մարզում բնակչության ազդարարման համար անհրաժեշտ 120 U-40 տիպի էլեկտրաշչակներից տեղադրված է 63-ը, որոնցից գործում է 58-ը:
Ըստ զեկուցողի` հաշվետու ժամանակահատվածում ՀՀ Արմավիրի մարզպետի համապատասխան որոշմամբ ստեղծված հանձնաժողովն իրականացրել է մարզի հեղեղավտանգ տարածքների, Արաքս գետի ափապաշտպան կառույցների վիճակի ուսումնասիրություն և արդյունքները ներկայացվել են վերադաս մարմիներին: Անդրադարձ եղավ նաև փրկարարական ուժերի պատրաստակամության բարձրացման, անձնակազմի կառավարման և իրավական ապահովման ուղղությամբ իրականացված աշխատանքներին:
Մարզպետ Աշոտ Ղահրամանյանը, ընդհանուր առմամբ, դրական գնահատեց մարզային կառույցի կողմից իրականացված աշխատանքները` նկատելով, որ որոշ նյութատեխնիկական բնույթի խնդիրների լուծման դեպքում առավել բարձր մակարդակով կիրականացվեն ոլորտին վերապահված գործառույթները: