Արմավիրի մարզպետի աշխատակազմ

Այսօր տեղի ունեցավ ՀՀ Արմավիրի մարզի խորհրդի 2013 թվականի անդրանիկ նիստը, որը վարեց ՀՀ Արմավիրի մարզպետ Աշոտ Ղահրամանյանը: Մարզխորհրդի նիստին մասնակցում էին ՀՀ Արմավիրի մարզպետի տեղակալներ Լարիս Մուրադյանը, Մովսես Քարտաշյանը, ՀՀ Արմավիրի մարզպետարանի աշխատակազմի ղեկավար Փառանձեմ Կարապետյանը, մարզպետարանի աշխատակազմի կառուցվածքային ստորաբաժանումների ղեկավարները, մարզի քաղաքային և գյուղական համայնքների ղեկավարները, ջրօգտագործող ընկերությունների (ՋՕԸ) տնօրեններն ու պատասխանատու այլ անձինք:

Մարզի խորհրդի նիստի օրակարգում ընդգրկված հարցերը վերաբերում էին ՀՀ Արմավիրի մարզում գարնան գյուղատնտեսական աշխատանքների նախապատրաստման ընթացքին, 2013 թվականի մարտի 1-ի դրությամբ ՀՀ Արմավիրի մարզի համայնքների սեփական եկամուտների հավաքագրման արդյունքներին և աշխատավարձերի վճարման ընթացքին:

Օրակարգային առաջին հարցի առնչությամբ ելույթ ունեցավ ՀՀ Արմավիրի մարզպետարանի աշխատակազմի գյուղատնտեսության և բնապահպանության վարչության պետ Արթուր Այվազյանը` մասնավորապես նշելով, որ 2013 թվականի գարնան նախապատրաստական աշխատանքները ՀՀ Արմավիրի մարզպետարանը, մարզի համայնքները, ՋՕԸ-երը և տնտեսվարող գյուղացիական տնտեսություններն ու ֆերմերները սկսել են դեռևս նախորդ տարվա  նոյեմբեր-դեկտեմբեր ամիսներից` մարզի զարգացման գերակա ուղղությունները և առաջնահերթ խնդիրները որոշելով և դրանց լուծմանն ուղղված համապատասխան ծրագրերի մշակելով:

Նրա խոսքով՝ ներկա դրությամբ մարզում ավարտվել է ապակյա և պոլիէթիլենային թաղանթի տակ ջերմատնեսային տնտեսություններում բանջարեղենի տարբեր տեսակների ցանքի և սածիլների աճեցման աշխատանքները, մինչև այս ամսվա ավարտը կսկսվի շուրջ 1500 հա պոլիէթիլենային թաղանթի տակ մշակվող վաղահաս բանջարեղենի ցանքը, լայն թափով ընթանում է կարտոֆիլի տունկը: Ավարտին են մոտենում պտղատու և խաղողի այգիների էտի և ձևավորման աշխատանքները, խաղողի այգիների չոր կապի, պտղատու այգիների 1-ին բուժման աշխատանքները:

Ըստ մարզպետարանի աշխատակազմի գյուղատնտեսության և բնապահպանության վարչության պետի՝ գարնանային հրատապ աշխատանքների իրականացման շրջանակներում առաջնային համարելով մարզի տարածքում գետերի գարնանային հեղեղումների դեմ պայքարի աշխատանքների կազմակերպումը՝ ՀՀ Արմավիրի մարզպետի համապատասխան կարգադրությամբ ստեղծված հանձնաժողովը ուսումնասիրել է մարզի տարածքով հոսող Արաքս, Քասախ, Մեծամոր գետերի և հեղեղատների ափապատնեշների փաստացի վիճակը, առանձնացվել են առաջնահերթ մաքրման ենթակա տարածքները, որոնք ներկայացվել են ՀՀ տարածքային կառավարման և գյուղատնտեսության նախարարություններ:

Արթուր Այվազյանի տեղեկացմամբ՝ այժմ պետական բյուջեից հատկացված միջոցներով Փշատավան համայնքի վարչական տարածքում աշխատանքներ են իրականացվում Արաքս գետի արգելաթմբի ամրացման, իսկ Ակնաշեն համայնքի վարչական տարածքում՝ Մեծամոր գետի ափապատնեշների ամրացման ուղղությամբ: Ընթացքի մեջ են նաև Խանջյանի և Մեծամորի հեղեղատարների հուների մաքրման ու ափերի բարձրացման աշխատանքները:

Նշվեց, որ ոռոգման համար նախատեսված ավելի քան 45 հազար հա հողատարածքների ոռոգման նպատակով ջրօգտագործողների հետ կնքվել են համապատասխան պայմանագրեր, ակտիվորեն ընթանում են ավելի քան 4816 կմ երկարությամբ միջտնտեսային և ներտնտեսային ցանցերի մաքրման, ինչպես նաև խորքային հորերի և պոմպակայանների վերանորոգման աշխատանքները:

Ներկայացնելով ցանքատարածությունների, գյուղատնտեսական արտադրության ծավալների ավելացման, ինչպես նաև գյուղացիական տնտեսությունների եկամուտների մեծացման նպատակով ՀՀ կառավարության կողմից իրականացվող աջակցության ծրագրերը՝ մարզպետարանի աշխատակազմի գյուղատնտեսության և բնապահպանության վարչության պետը մասնավորապես ընդգծեց, որ առաջիկա օրերին մարզին կհատկացվի 7000 կգ գարնանացան գարու և 1630 կգ առվույտի սերմացու՝ տրամադրելու 2012 թվականի ընթացքում հայտեր ներկայացրած համայքներին: Նույնատիպ հայտերի հիման վրա ՀՀ կառավարության համապատասխան ծրագրերով մարզին հատկացվել է նաև 7000 տոննա ազոտական պարատանյութ և 2000 տոննա դիզելային վառելանյութ՝ շուկայականից անհամեմատ ցածր գներով: Միաժամանակ տեղեկացվեց, որ արդեն որոշակի խմբաքանակ ներկրվել է մարզ և հատկացվել համայնքներին:

Անդրադառնալով գյուղատնտեսական արտադրության կարևորագույն ճյուղերից մեկին՝ անասնաբուծությանը, Արթուր Այվազյանը հայտնեց, որ անասնագլխաքանակը տարեցտարի մարզում ավելանում է, և 2013 թվականի հունվարի 1-ի դրությամբ հաշվառվել է 54894 գլուխ խոշոր եղջերավոր կենդանի, 90025 գլուխ մանր եղջերավոր կենդանի, 20683 գլուխ խոզ, 1511529 գլուխ թռչուն:

Իր զեկույցում մարզպետարանի աշխատակազմի գյուղատնտեսության և բնապահպանության վարչության պետն անդրադարձավ նաև գյուղմթերքի իրացման հարցին՝ նշելով, որ ՀՀ կառավարությունն առաջարկել է բոլոր վերամշակող ձեռնարկություններին՝ մթերել արտադրված գյուղմթերքի գրեթե ողջ ծավալը` նախապես կնքված պայմանագրերի հիման վրա: Ընդգծելով, որ գյուղատնտեսկան արտադրությունն առանց վարկավորման անհնարին է պատկերացնել՝  նա միաժամանակ տեղեկացրեց, որ տրամադրվող վարկերի հասանելիությունը բնակչության լայն խավերին ապահովելու, ինչպես նաև ցածր տոկոսադրույքներով տրամադրելու նպատակով՝ ՀՀ կառավարությունն այս տարի ևս շարունակելու է վարկերի սուբսիդավորման գործընթացը: Վարկերը կտրամադրվեն առավելագույնը 3 մլն դրամ արժեքով, 2 տարի ժամկետով, վեց ամիս հետո մարելու պայմանով և 14 տոկոս տոկոսադրույքով, որից 4-6 տոկոսը, կախված համայնքի աղքատության մակարդակից, կսուբսիդավորի պետությունը:

2013 թվականի մարտի 1-ի դրությամբ համայնքների սեփական եկամուտների հավաքագրման արդյունքները ներկայացրեց ՀՀ Արմավիրի մարզպետարանի աշխատակազմի ֆինանսական և սոցիալ-տնտեսական զարգացման վարչության պետ Վարազդատ Մկրտչյանը: Ըստ նրա` հաշվետու ժամանակահատվածում մարզի համայնքների բյուջեների սեփական եկամուտների փաստացի մուտքերը նախատեսված 297 մլն 486.3 հազար դրամի դիմաց կազմել են 221 մլն 932.4 հազար դրամ, կատարողականը` 74.6 տոկոս: Հավաքագրման մակարդակը 2012 թվականի նույն ժամանակահատվածի համեմատ աճել է 6.6 տոկոսով: Նա տեղեկացրեց նաև, որ նշված ժամանակահատվածում մարզի համայնքներում գոյացել է 6 մլն դրամ ընթացիկ աշխատավարձի պարտք:

Այնուհետև Վարազդատ Մկրտչյանը ներկայացրեց 50 տոկոսից ցածր հավաքագրում ապահոված և աշխատավարձերի ընթացիկ պարտքեր կուտակած համայնքները:

Համապատասխան համայնքների ղեկավարներին մարզպետ Աշոտ Ղահրամանյանն առաջարկեց ամենայն պատասխանատվությամբ վերաբերվել սեփական եկամուտների հավաքագրման գործընթացին` ապահովելով համայնքի բյուջեով պլանավորված սեփական եկամուտների հավաքագրման ցուցանիշները և միաժամանակ կոչ արեց սեղմ ժամկետներում մարել աշխատավարձերի ընթացիկ պարտքերը:
Օրակարգային հարցերի ավարտից հետո եղան նաև հայտարարություններ: