Արմավիրի մարզպետի աշխատակազմ

Այսօր ՀՀ Արմավիրի մարզպետ Աշոտ Ղահրամանյանի մոտ հակակարկտային կայաններ ունեցող համայնքների ղեկավարների մասնակցոթյամբ տեղի ունեցած խորհրդակցությանը քննարկվեցին հակակարկտային կայանների արդյունավետ շահագործմանը եւ ընթացիկ սպասարկմանը վերաբերող հարցեր: Խորհրդակցությանը ներկա էին նաեւ ՀՀ Արմավիրի մարզպետարանի աշխատակազմի գյուղատնտեսության եւ բնապահպանության վարչության պետը եւ "ՀայՌուսգազարդ" ՓԲԸ-ի ենթակայությամբ գործող "Բութան" ՍՊԸ-ի ներկայացուցիչը:

<<Հանրապետությունում ամենամեծ թվով հակակարկտային կայանները տեղադրված են Արմավիրի մարզում, եւ մենք արդեն համաոզվել ենք, որ հակակարկտային հրթիռների ճիշտ և ժամանակին գործարկումը 90 տոկոսով հողատարածքները պաշտպանում է կարկուտից>>,-ասաց մարզպետ Աշոտ Ղահրամանյանը՝  կոչ անելով համայնքապետերին սեղմ ժամկետներում ավարտել կայանների լիցքավորման եւ ընթացիկ սպասարկման հետ կապված աշխատանքները՝ թույլ չտալով, որ գյուղացիական տնտեսությունները վնասներ կրեն կարկուտի հետևանքով: Նա իր խսքում նշեց, որ ընթացիկ տարում մարզում նախատեսվում է տեղադրել եւս 15 հակակարկտային կայան, որոնց գործակումը մարզն ամբողջությամբ կպաշտպանի կարկուտից:

Նշենք, որ Արմավիրի մարզում վերջին տարիներին տեղադրվել է 99 հակակարկտային կայան. 70-ը՝ պետական աջակցությամբ, 28-ը՝ Վիվա Սել-ՄՏՍ ընկերությաև աջակցությամբ եւ 1-ը՝ բարեգործական ծրագրով: Մարզի 28 համայնքում տեղադրված ընդհանուր թվով 99 հակակարկտային կայանները կարկուտից պաշտպանում են շուրջ 8000 հա գյուղացիական նշանակության հողատարածք: Հակակարկտային կայանների լիցքավորման եւ ընթացիկ սպասարկաման ծախսերը հոգում են համապատասխան համայնքապետարանները:

Խորհրդակցությանը ներկայացվեցին նաև "Բութան" ՍՊԸ-ի կողմից մատուցվող ծառայությունները: Նշվեց, որ ընկերությունը հիմնականում զբաղվում է հեղուկ գազի ընդունման, պահեստավորման, տեղափոխման եւ իրացման աշխատանքներով, իրականացնում է հեղուկ գազի բալոնների վերանորոգում եւ վկայագրում, գազալիցքավորման կայանների սարքավորումների շահագործում, ընթացիկ վերանորոգում եւ կարգաբերում, զբաղվում է նաև բութանաօդային խառնուրդի արտադրությամբ: Միաժամանակ ներկայացնելով մատուցվող ծառայությունների համար նախատեսվող գնային ճկուն քաղաքականությունը՝ ընկերության ներկայացուցիչը պատրաստակամություն հայտնեց ցանկության դեպքում համագործակցել հակակարկտային կայաններ ունեցող համայնքների ղեկավարների հետ եւ ապահովել հակակարկտային կայանների արդյունավետ եւ անխափան շահագործումը: