Արմավիրի մարզպետի աշխատակազմ

Հայ Առաքելական Եկեղեցու Արմավիրի թեմի հոգևոր առաջնորդ Տեր Սիոն եպիսկոպոս Ադամյանի ձեռամբ այսօր կատարվեց Բաղրամյանի տարածաշրջանի Դալարիկ համայնքում կառուցվող եկեղեցու հիմնարկեքը:

Եկեղեցին կառուցվում է ծնունդով Դալարիկից Գագիկ Վարդանյանի նախաձեռնությամբ, ով երկար տարիներ գլխավորում է <<Բաղրամյանշին>> ընկերությունը:
Ճարտարապետական նախագծի հեղինակն է Սեդրակ Վարդանյանը:

Սիոն Սրբազանի հանդիսապետությամբ Արմավիրի թեմի հոգևոր սպասավորները նախ գինով ու ջրով լվացին, և ապա սրբալույս մյուռոնով թեմակալ առաջնորդը օծեց տասներկու առաքյալների ու չորս ավետարանիչների անուններով հիմնաքարերը, որից հետո դրանք տեղադրվեցին նոր կառուցվելիք եկեղեցու հիմքում:

Հիմնարկեքի արարողությանը ներկա էին ՀՀ Արմավիրի մարզպետ Աշոտ Ղահրամայնանը, համայնքային իշխանության պատասխանատուներ, մեծ թվով դալարիկցիներ և հյուրեր:

Արմավրի թեմի հոգևոր առաջնորդը պատմական համարեց Դալարիկում կառուցվող եկեղեցու հիմնարկեքը, քանի որ նոր կառուցվող հոգևոր տունը Բաղրամյանի տարածաշրջանում լինելու է առաջինը. <<Եկեղեցի կառուցելով մեր գործը չենք ավարտելու, այն շարունակելու ենք հոգևոր զարգացմամբ և հավատի ամրապնդմամբ, որը կենդանություն կպարգևի և կապրեցնի մեր եկեղեցին>>,- իր խոսքում ընդգծեց Սիոն Սրբազանը:

Մարզպետ Աշոտ Ղահրամանյանը ևս կարևորեց կառուցվող եկեղեցու դերը Դալարիկ համայնքի և հարակից համայնքների կյանքում` նշելով, որ ժողովուրդն այդպիսով կունենա իր սրբատեղին, որն իր շուրջը կհամախմբի տարածաշրջանի հավատավոր բնակչությանը: