Արմավիրի մարզպետի աշխատակազմ

 ՀՀ Արմավիրի մարզպետ Աշոտ Ղահրամանյանն այսօր հրավիրված տարեվերջյան ամփոփիչ ասուլիսին ներկայացրեց հաշվետու ժամանակահատվածում մարզում իրականացված հիմնական աշխատանքները, խոսեց նաև հիմնախնդիրների ու նախատեսվող ծրագրերի մասին:

Ա. Ղահրամանյանի խոսքով՝ անցնող տարին կարող էր առավել արդյունավետ լինել Արմավիրի մարզի համար, եթե մայիս ամսին տհաճ անակնկալ չմատուցեր աղետալի կարկտահարությունը, որը մեծ վնաս հասցրեց մարզի 46 համայնքի գյուղացիական տնտեսություններին: Միայն 26 համայնքում վնասի չափը կազմել է 100 տոկոս:

Սակայն, ինչպես նշեց մարզպետը, ի պատիվ Հանրապետության Նախագահի, կառավարության, առանձին անհատների ու կազմակերպությունների նախաձեռնությամբ իրականացված աջակցության ծրագրերի՝ գյուղացին իրեն միայնակ չզգաց ստեղծված իրավիճակում և, ընդհանուր առմամբ, հաջողվեց մեղմել կարկտահարության հասցրած վնասները:

Անդրադառնալով գյուղատնտեսության ոլորտում իրականացված աշխատանքներին՝ մարզպետ Ա. Ղահրամանյանը նշեց, որ չնայած աննախադեպ կարկտահարությանը՝ ձեռնարկված համալիր միջոցառումների շնորհիվ հաշվետու տարում հացահատիկի, բոստանի, բանջարեղենի և խոտի արտադրության ծավալը մարզում գերազանցել է նախորդ տարվա մակարդակը: Թերակատարում է գրանցվել միայն կարտոֆիլի մասով:

Մարզպետի խոսքով՝ 2013թ. գյուղատնտեսական արտադրության մեջ գույքագրվել է 43303 հա հողատարածություն, որը 656,2 հեկտարով կամ 1,53 տոկոսով ավել է 2012-ի համեմատությամբ: Հաշվետու տարում մարզում հիմնվել են 575,87հա բազմամյա տնկարքներ՝ այդ թվում՝ 334,13հա պտղատու և 241,74հա խաղողի այգիներ:

Ըստ մարզպետի՝ պայմանական անասնագլխաքանակը հաշվետու ժամանակահատվածում կազմել է 71247 գլուխ, որը 13455 պայմանական գլխով ավել է նախորդ տարվա համեմատությամբ, կամ պայմանական անասնագլխաքանակը ավելացել է 23,3 տոկոսով: Մարզում նախորդ տարվա համեմատությամբ 22,3 տոկոսով գերազանցվել է մսի, 9,7 տոկոսով՝ կաթի և 35,9 տոկոսով՝ ձվի արտադրության ցուցանիշը:

Մարզպետ Ա. Ղահրամանյանն իր խոսքում ընդգծեց, որ գյուղատնտեսության բնագավառում 2013թ. կտրվածքով համախառն արտադրանքի արժեքը կգերազանցի 150 մլրդ դրամի շեմը, որը 4-5 տոկոսով ավել է նախորդ տարվա համեմատությամբ:

Խոսելով մարզի առևտրաարդյունաբերական ընդհանուր իրավիճակի մասին՝ մարզպետը նախ ներկայացրեց մարզում էական կշիռ ունեցող արտադրական ձեռնարկությունները և նշեց, որ դրանցում թողարկված արտադրանքի ծավալը 2013թ. հունվար-սեպտեմբեր ամիսներին ընթացիկ գներով կազմել է 39641.5 մլն դրամ, պատրաստի արտադրանքի իրացումը՝ 39659.0 մլն դրամ, իսկ արդյունաբերական արտադրանքի ինդեքսը՝ 107.8 տոկոս:

Ըստ նրա՝ 2013թ. հունվար-սեպտեմբեր ամիսներին Արմավիրի մարզի սպառողական շուկայում մանրածախ առևտրի շրջանառությունը կազմել է մոտ 21.5 մլրդ. դրամ, ընդ որում՝ առևտրի շրջանառության գերակշռող մասը` 12.9 մլրդ դրամ կամ 60 տոկոսը ձևավորվել է խանութների և սպառողական ապրանքների շուկաների միջոցով: Միջին հաշվով մեկ բնակչին բաժին ընկնող մանրածախ առևտրի շրջանառությունը կազմել է 80325.9 դրամ կամ հանրապետության միջինի նկատմամբ 25.6 տոկոս:

Ա. Ղահրամանյանը նշեց, որ մարզում գործում են 453 մանրածախ առևտրի օբյեկտ, որից՝ 172 խանութ, 4 սպառողական շուկա, 2 գյուղարտադրանքի շուկա, 227 կրպակ, 48 առևտրի այլ օբյեկտներ: Իսկ ծառայությունների ծավալը կազմում է 12.4 մլրդ.դրամ, միջին հաշվով մեկ բնակչին բաժին ընկնող ծառայությունների ծավալը կազմում է 12430.1 դրամ կամ հանրապետության միջինի նկատմամբ 19 տոկոս:

Նա տեղեկացրեց, որ ըստ Արդարադատության նախարարության իրավաբանական անձանց պետական ռեգիստրի (e-register.am) հրապարակած տվյալների` Արմավիրի մարզում գործում են ընդհանուր առմամբ 1417 առևտրային կազմակերպություններ, 439 հասարակական կազմակերպություններ և 6462 անհատ ձեռնարկատերեր: 2013թ. հունվարի 1-ից դեկտեմբերի 10-ն ընկած ժամանակահատվածում պետական ռեգիստրում գրանցվել են 988 կազմակերպություններ, այդ թվում՝ 72 ՍՊԸ, 4 ՀԿ, 4 ՀՈԱԿ, 1 ոչ առևտրային մասնաճյուղ, 2 առևտրային մասնաճյուղ, 1 հիմնադրամ, 1 հիմնարկ, 1 սպառողական կոոպերատիվ և 902 անհատ ձեռնարկատեր, որն, ըստ նրա, նախադրյալներ է ստեղծել մարզում նոր աշխատատեղերի ավելացման ուղղությամբ:

Ներկայացնելով հաշվետու տարում մարզում իրականացված ներդրումային ծրագրերը՝ Ա. Ղահրամանյանն ընդգծեց, որ պետական և մասնավոր ներդրումների արդյունքում իրականացվել են շուրջ 11076.6 մլն դրամի տարբեր ոլորտային ծրագրեր, այդ թվում՝ ՀՀ պետական բյուջեի միջոցներով՝ 8207.5 մլն դրամի, միջազգային և դոնոր կազմակերպությունների միջոցներով՝ 47.9 մլն դրամի, մասնավոր ներդրումներով՝ 2492.9 մլն դրամի և համայնքային բյուջեի միջոցներով՝ 328.3 մլն դրամի:

Ըստ մարզպետի՝ անցնող տարում իրականացվել են հետևյալ հիմնական աշխատանքները. վերանորոգվել է 18 դպրոց և 3 մանկապարտեզ, 5 դպրոցում ներդրվել է լոկալ ջեռուցման համակարգ, 18 երաժշտական և արվեսի կրթօջախներ ապահովվել են անհրաժեշտ մշակութային գույքով և օժանդակ սարքավորումներով, բացվել է 13 նախակրթարան, վերաբացվել է 3 բժշկական ամբուլատորիա, ևս 2-ը կվերաբացվի Վանանդ և Բագարան համայնքներում, իսկ բժշկական կենտրոնները համալրվել են նորագույն սարքավորումներով, Արմավիր քաղաքի Շահումյան 11 և 13 վթարային շենքերի 44 ընտանիք վերաբնակեցվել է վերակառուցված և բնակելի շենքի համապատասխանեցած Արմավիրի պահածոների գործարանի նախկին վարչական շենքում, լուծվել է ևս 3 անապահով ընտանիքի բնակարանային խնդիր, գազաֆիկացվել է 4 համայնք, վերանորոգվել են 3 քաղաքային համայնքների թվով 8 բազմաբնակարան շենքերի տանիքներ, հիմնանորոգվել է միջպետական և հանրապետական նշանակության 32.9 կմ ճանապարհ, մի շարք համայնքներ ապահովվել են փողոցային լուսավորությամբ, մեծածավալ աշխատանքներ են տարվել խմելու ջրամատակարարման և ջրահեռացման համակարգերում, իրականացվել են նաև առաջնային նշանակության մի շարք այլ ոլորտային ծրագրեր:

Անդրադառնալով կրթության ոլորտին՝ մարզպետ Ա. Ղահրամանյանը տեղեկացրեց, որ մարզային ենթակայության 21 հիմնական, 2 հատուկ և 91 միջնակարգ դպրոցներում 2013-2014 ուսումնական տարում ընդգրկված է եղել 30673 աշակերտ, այդ թվում՝ 3457 առաջին դասարանցի: Նա ուրախությամբ փաստեց, որ մարզում տարեցտարի ավելանում է առաջին դասարան հաճախողների թիվը. այս տարի այն աճել է 175-ով, իսկ նախորդ տարի՝ 287-ով:

Ա. Ղահրամանյանի խոսքով՝ մարզում նախադպրոցական կրթություն է իրականացնում ընդհանուր թվով 34 դպրոց, որոնցում գործում է 47 խումբ՝ 957 երեխաներով: Մարզում գործում է նաև 61 մանկապարտեզ, որոնցում ընդգրկված է 4980 երեխա: 2013-2014 ուսումնական տարում մարզի հանրակրթական դպրոցներում աշխատում է 3287 ուսուցիչ: Ատեստավորման նպատակով վերապատրաստվել է 648 ուսուցիչ, որից ատեստավորվել է 608-ը:

Մարզպետը հավաստիացրեց, որ կանոնավոր կերպով բարելավվում է դպրոցների նյութա-տեխնիկական բազան, կահավորումը և ուսուցողական պարագաներով վերազինումը, իսկ դպրոցներն ապահովված են անհրաժեշտ քանակությամբ դասագրքերով:

Ա. Ղահրամանյանն անդրադարձավ նաև առողջապահության և սոցիալական ապահովության ոլորտներին՝ մասնավոապես ընդգծելով, որ հաշվետու ժամանակահատվածում մարզի երեք հիվանդանոցներում համավճարի սկզբունքով հիվանդանոցային բուժօգնութուն է ստացել 8699 հիվանդ, վճարի չափը կազմել է 34 մլն 501 հազար դրամ: 1509 հիվանդ ստացել է վճարովի բուժօգնություն` վճարելով 97 մլն 344 հազար դրամ:

Նա նշեց, որ 2013թ. կենտրոնական գնմամբ և մարդասիրական ճանապարհով տարբեր հիվանդությունների բուժման նպատակով ստացվել և մարզի բուժհաստատություններին է բաշխվել շուրջ 204 մլն 994 հազար դրամի տարբեր դեղամիջոցներ: Մարզի բոլոր հիվանդանոցները հաշվետու տարում պարբերաբար ձեռք են բերել և մշտապես ապահովված են եղել անտիգյուրզինով, հակափայտացման, հակաբոտուլինային շիճուկներով, հակակատաղության վակցինայով և հակափայտացման անատոքսինով:

Նա նշեց նաև, որ համաճարակային իրավիճակը մազում եղել է կայուն և վերահսկելի: 2013 թվականի դեկտեմբերի 1-ի դրությամբ մարզում ծնվել է 2607 երեխա, մահացել` 0 -18 տարեկան 17 երեխա, իսկ մայրական մահացության դեպք վերջին 6 տարիներին չի արձանագրվել:

Ներկայացնելով սոցիալական ապահովության ոլորտում իրականացված աշխատանքները՝ մարզպետը մասնավորապես տեղեկացրեց, որ 2013 թվականի հաշվետու ժամանակահատվածում մարզի երեք սոցիալական ծառայությունների տարածքային գրասենյակներում /ՍԾՏԳ/ կազմակերպվել և իրականացվել են ընտանիքների անապահովության գնահատման համակարգով հաշվառված ընտանիքների փաստագրման աշխատանքներ: Դեկտեմբերի 1-ի դրությամբ փաստագրվել է 6723 ընտանիք, որից նպաստառու է` 5558-ը: Իսկ մարզպետարանի կողմից հրատապ դրամական օգնություն է տրամադրվել 1614 ընտանիքի:

Ա. Ղահրամանյանի փոխանցմամբ՝ նույն ժամանակահատվածի կտրվածքով մարզի զբաղվածության տարածքային գործակալություններում հաշվառված է աշխատանք փնտրող 4597 մարդ, որոնցից գործազուրկի կարգավիճակ է ստացել 2482-ը: Հաշվետու ժամանակահատվածում գործակալություններում հաշվառված աշխատանք փնտրող անձանցից աշխատանքի են տեղավորվել 392-ը:

Մարզպետը խոսեց նաև ներմարզային խնդիրների, դրանց լուծման հնարավոր ուղիների, արտաքին հարաբերությունների ոլոտում իրականացված աշխատանքների և նախատեսվող ծրագրերի մասին: Մարզպետ Ա. Ղահրամանյանի գնահատմամբ` անելիքներ բոլոր ոլորտներում էլ դեռ կան և դրանց ըստ առաջնայնության լուծում կտրվի: