Արմավիրի մարզպետի աշխատակազմ

Այսօր ՀՀ Արմավիրի մարզպետարանում տեղի ունեցավ Արտակարգ իրավիճակների նախարարության (ԱԻՆ) Արմավիրի մարզային փրկարարական վարչության 2013 թվականի գործունեության ամփոփման հաշվետու նիստը, որը վարում էր մարզպետ Աշոտ Ղահրամանյանը:

Հիմնական զեկույցով հանդես եկավ ԱԻՆ փրկարար ծառայության Արմավիրի մարզային փրկարարական վարչության պետ, փ/ծ գնդապետ Ա. Ամիրջանյանը, ում ղեկավարած կառույցի գործունեությունն ուղղված է եղել քաղաքացիական պաշտպանության համակարգի կատարելագործմանը և արտակարգ իրավիճակներում բնակչության պաշտպանության խնդիրների իրականացմանը:

Նրա զեկուցմամբ` ՀՀ արտակարգ իրավիճակների նախարարության Փրկարար ծառայության Արմավիրի մարզային փրկարարական վարչության 2013 թ-ի հիմնական միջոցառումների պլանով նախատեսված միջոցառումները կատարվել են ամբողջությամբ: Ընթացիկ տարում մարզի տարածքում գրանցվել է` 587 արտակարգ դեպք (2012թ-ին` 506 դեպք), որի հետևանքով զոհվել է 9 մարդ (2012 թ-ին`24 մարդ), տուժել է 439 մարդ (2012թ-ին`392 մարդ): Արդյունքում` 2013-ի ընթացքում մարզում 2012-ի համեմատությամբ գրանցված արտակարգ դեպքերը աճել են 81-ով, զոհերի թիվը նվազել է 15-ով, իսկ տուժածների թիվն աճել է 47-ով: Արտակարգ դեպքերի աճը հիմնականում պայմանավորված է հրդեհների`17, թունավորումների` 50 և գրանցված ճանապարհատրանսպորտային պատահարների` 18 աճով:

Ա. Ամիրջանյանը նշեց, որ հաշվետու ժամանակահատվածում ՀՀ ԱԻՆ ՓԾ Արմավիրի ՄՓՎ ստորաբաժանումների կողմից արտակարգ դեպքերի հետևանքների վերացման նպատակով իրականացվել է 374 ելք, որից 329-ը հրշեջ փրկարարական ջոկատների կողմից, 45-ը ՃԿԿ օպերատիվ խմբի կողմից: Գրանցվել է հրդեհների առաջացման վերաբերյալ 178 ահազանգ, որից հրդեհ է գրանցվել 166 դեպքում: Արձանագրվել է 56028000 դրամի նյութական վնաս (2012թ-ին` 36874630 դրամի):

Զեկուցողի խոսքով՝ պլանների և ծրագրերի մշակման ուղղությամբ իրականացվել են 97 համայնքի, 100 և ավելի աշխատող ու աշակերտ ունեցող 50 դպրոցի, 4 հատուկ դպրոցի, 2 բժշկական կենտրոնի և 1 հիվանդանոցի, 1 ծննդատան, 5 բարձրագույն և միջնակարգ մասնագիտական ուսումնական հաստատության, 3 հյուրանոցային տնտեսության, Սարդարապատի հուշահամալիրի, 1 երթուղային կայարանի,, պաշտպանական, տնտեսության համար ռազմավարական նշանակություն ներկայացնող 3 կազմակերպությունների, մարզի 9 ՔՊ պլանների ճշգրտումներ:

Այնուհետև ներկայացվեցին ԱԻՆ տարբեր ոլորտներում կատարված աշխատանքների վերաբերյալ զեկույցներ ու հաշվետվություններ, որոնց առնչությամբ հնչած հարցերին պատասխանեցին ոլորտի պատասխանատուները:

ՀՀ ԱԻՆ նախարարի առաջին տեղակալ Հայկարամ Մխիթարյանը, բավարար գնահատելով կատարված աշխատանքները, նշեց, որ չնայած արդյունքները գոհացուցիչ են, բայց դեռ շատ անելիքներ կան: Եվ, ըստ նրա, տարեցտարի պետք է պակասեն բացթողումները, շտկվեն թերությունները:

Նիստն ամփոփեց մարզպետ Աշոտ Ղահրամանյանը՝ ասելով. <<Իսկապես գնահատելի են Արմավիրի մարզային փրկարարական վարչության աշխատանքները վերջին տարիների համեմատությամբ, ինչը չափազանց կարևոր է մարզի համար: Մեր համագործակցությունը մնացած բոլոր ֆեդերալ կառույցների հետ գտնվում է բարձր մակարդակի վրա, և կարծում եմ, որ մեր հնարավորություններն անընդհատ պետք է ներդնենք, որպեսզի եղածը պահպանենք ու փոխանցենք մեր հետնորդներին: Շնորհակալություն կատարած աշխատանքների համար>>: