Արմավիրի մարզպետի աշխատակազմ

Այսօր ՀՀ Արմավիրի մարզպետ Աշոտ Ղահրամանյանն ընդունեց Ռուսաստանի Դաշնության Ռոստովի շրջանի Շախտի քաղաքից ժամանած պատվիրակությանը, որը գլխավորում էր քաղաքապետ Ստանիսլավով Դենիս Իվանովիչը: Հանդիպմանը ներկա էին փոխմարզպետներ Լարիսա Մուրադյանը, Մովսես Քարտաշյանը, Դավիթ Սամսոնյանը, մարզպետարանի աշխատակազմի ղեկավար Փառանձեմ Կարապետյանը, Արմավիրի քաղաքապետ Ռուբեն Խլղաթյանը:

Մարզպետ Աշոտ Ղահրամանյանը ողջունեց հյուրերի այցը` բարձր գնահատելով հայ-ռուսական համագործակցությունը: Ներկայացնելով մարզի հիմնական առանձնահատկություններն ու ներուժը՝ նա պատրաստակամություն հայտնեց կյանքի կոչել նոր ծրագրեր, գաղափարներ` կողմերի միջև ձևավորված բարեկամությունը ամրապնդելու նպատակով:

Շնորհակալություն հայտնելով մարզպետին ջերմ ընդունելության համար` պատվիրակության անդամները վստահեցրեցին, որ իրենք նույնպես պատրաստ են երկու ժողովուրդների միջև ստեղծված հարաբերությունները պահպանել և ավելի արդյունավետ դարձնել:

Նշենք, որ մինչ մարզպետարան այցելելը, պատվիրակությունը եղել է Արմավիրի քաղաքապետարանում: Երկու քաղաքների միջև բարեկամական-եղբայրական համաձայնագիր է կնքվել, որից հետո քաղաքապետ Ռ. Խլղաթյանի ուղեկցությամբ պատվիրակությունը ծաղիկներ է խոնարհել Հայրենական մեծ պատերազմում և Արցախյան հերոսամարտում զոհվածների հիշատակը հավերժացնող հուշարձաններին: