Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Տեղի ունեցավ Արմավիր քաղաքի Սուրբ Գրիգոր Նարեկացի եկեղեցու օծումը
31.05.2014
Այսօր հանդիսավոր պայմաններում տեղի ունեցավ Արմավիրի մարզկենտրոնում գտնվող Գրիգոր Նարեկացի եկեղեցու օծումը, որի հիմնարկեքը տեղի է ունեցել 2012 թվականին՝ Հայ Առաքելական Եկեղեցու Արմավիրի թեմի առաջնորդ Տեր Սիոն եպիսկոպոս Ադամյանի հանդիսապետությամբ:
Եկեղեցու բացման արարողությանը ներկա էր նաև Հանրապետության Նախագահ Սերժ Սարգսյանը, ով մասնակցեց հոգևոր տան առաջին պատարագին և դրան հաջորդող տոնական միջոցառմանը:
Բազիլիկ ոճով եկեղեցին կառուցվել է ճարտարապետ Միքայել Մկրտչյանի նախագծով, բարերար Կարեն Մկրտչյանի հովանավորությամբ, ով երկու տասնամյակից ավելի բնակվում է ՌԴ Սակտ Պետերբուրգ քաղաքում և տեղի հայ համայնքի նախագահն ու Հայ Առաքելական Եկեղեցու ատենապետն է:
Եկեղեցում կայացած առաջին պատարագից հետո Արմավիրի թեմի առաջնորդ Տեր Սիոն եպիսկոպոս Ադամյանը նշեց, որ քաղաքն արդեն 83 տարեկան էր, սակայն այն դեռ չուներ հոգևոր կենտրոն. <<Խորհրդային տարիներին հնարավոր չէր եղել այստեղ եկեղեցի կառուցել, և չափազանց ուրախալի է, որ այսօր արմավիրցիներն ունեցան իրենց հոգևոր կենտրոնը>>:
Օրվա առթիվ շնորհավորելով ներկաներին՝ մարզպետ Աշոտ Ղահրամանյանը նշեց. <<Մեծարգո Նախագահ, սրբազան հայրեր, սիրելի արմավիրցիներ, ի սրտե շնորհավորում եմ բոլորիս այս հրաշալի տոնի կապակցությամբ, քանզի առաջին անգամ Արմավիր քաղաքում բացվեց Աստծո տունը, որտեղ մեր հավատացյալներն իրենց աղոթքը կբարձրացնեն առ Աստված:
Այս առիթով ես ուզում եմ իմ խորին երախտագիտությունը հայտնել մեր բարերար Կարեն Մկրտչյանին, ում շնորհիվ կառուցվեց և ձեզ հանձնվեց այս հոյակերտ շինությունը: Դրա հետ մեկտեղ ես ուզում եմ նաև մեր խորին երախտագիտությունն ու շնորհակալությունը հայտնել Հանրապետության Նախագահին, ով բոլոր ժամանակներում եղել է արմավիրցիների կողքին և այսօր էլ մեր ուրախությունը կիսելու համար իր ծանրաբեռնված ժամանակը տրամադրել է մեզ:
Կրկին շնորհավորում եմ բոլորիս այս հրաշալի օրվա կապակցությամբ>>:
Բարերար Կարեն Մկրտչյանին եկեղեցու կառուցման նախաձեռնության և իրականացման համար Արմավիրի թեմի առաջնորդ Տեր Սիոն եպիսկոպոս Ադամյանի կողմից շնորհվեց Գրիգոր Լուսավորիչ մեդալ, իսկ Արմավիրի քաղաքապետ Ռուբեն Խլղաթյանի կողմից՝ Արմավիրի պատվավոր քաղաքացու կոչում:
