Արմավիրի մարզպետի աշխատակազմ

Շենիկ գյուղական համայնքն Արմավիրի մարզի գերնորմատիվային ջրապահանջարկ ունեցող այն համայնքներից է, որտեղ ոռոգման նորմերը բարձր են նորմատիվայինից առնվազն 1.5-2.0 անգամ: Նշված խնդրին Շենիկում այս տարի գումարվել է ևս մեկը՝ պայմանավորված ոռոգման ջրի սակավությամբ, որն անդրադառնում է համայնքում հիմնականում մշակվող առվույտի բերքատվության վրա:

Ըստ համայնքի ղեկավար Կորյուն Մինասյանի՝ խնդիրն այս աստիճան չէր սրվի, եթե վանասատու միջատները գարնանը գրեթե ամբողջությամբ չվնասեին առվույտի շուրջ 650 հա ցանքատարածությունները և այդ պատճառով չհետաձգվեր առաջին բերքահավաքը, որը կատարվել է նախատեսված ժամանակահատվածից ավելի քան մեկ ամիս ուշացումով՝ հունիսի առաջին 10-օրյակի փոխարեն՝ հուլիսի 15-20-ն ընկած ժամանակահատվածում:

Եվ այժմ գյուղացու պահանջն է մինչև երկրորդ բերքահավաքը 1-2 անգամ լիարժեք ոռոգել առվույտի ցանքատարածությունները՝ կրած վնասը վերականգնելու  և կատարած ծախսերը հոգալու համար:

Լսելով շենիկցիների բողոքը՝ մարզպետ Աշոտ Ղահրամանյանն ընդգծեց, որ սակավաջուր համարվող այս տարում համատեղ ուժերով պետք է անել ամեն ինչ, որպեսզի ոռոգման շրջանը պատվով հաղթահարվի: Նա իր խոսքում նշեց, որ ջրաշրջանառության արդյունավետ կազմակերպման և ընթացիկ խնդիրների կարգավորման նպատակով ՀՀ կառավարության որոշմամաբ 550 մլն դրամ է հատկացվել Արմավիրի մարզում շուրջ 115 խորքային հոր վերագործարկելու նպատակով, ինչն էլ, ըստ մարզպետի, հնարավորինս մեղմել է լարվածությունը:

Շենիկցիների հետ մարզպետի հանդիպման ընթացքում պայմանավորվածություն ձեռք բերվեց համայնքին հատկացվող ջրաքանակը հնարավորինս օպտիմալ օգտագործելու և խնդրին ըմբռնումով մոտենալու վերաբերյալ:

Շենիկ համայնքի ոռոգելի հողատարածքներում ստեղծված իրավիճակին տեղում ծանոթանալու և բարձրացված խնդրի վերաբերյալ առավել ամբողջական պատկերացում կազմելու նպատակով մարզպետ Աշոտ Ղահրամանյանի հանձնարարությամբ մարզպետարանի ոլորտը ներկայացնող պաշտոնյաներն այժմ գույքագրում են կատարում համապատասխան հողատարածքներում: