Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Արմավիրում հարգանքի տուրք մատուցվեց Հայոց ցեղասպանության սուրբ նահատակների հիշատակին
24.04.2015
Այսօր Արմավիրի մարզային և քաղաքային իշխանությունները, քաղաքական, հասարակական կազմակերպությունների, կրթական հաստատությունների ներկայացուցիչները ծաղիկներ և ծաղկեպսակներ դրեցին մարզկենտրոն Արմավիրում Հայոց ցեղասպանության սուրբ նահատակների հիշատակը հավերժացնող հուշակոթողին:
Հուշակոթողի մոտ Արմավիրի թեմը, հանդիսապետությամբ առաջնորդ Տեր Սիոն եպիսկոպոս Ադամյանի, կատարեց հատուկ մշակված ծիսական արարողակարգ` բարեխոսություն հայցելով արդեն Հայաստանյայց Առաքելական Սուրբ եկեղեցու սրբեր հռչակված Ցեղասպանության նահատակներից:
<<Թող նահատակ մեր սրբերի բարեխոսությամբ մեր բոլոր աղոթքները, աղաչանքներն ու խնդրանքներն առ Աստված ի կատար ածվեն: Սա մեծագույն հաղթանակ է, և մենք արդեն մեր ուսերից պետք է թոթափենք ցավի, լացի, կսկիծի բեռը և առաջ ընթանանք` չմոռանալով արդար հատուցում պահանջել հայ ազգի կրած բարոյական և նյութական վնասների համար: Փառք Հայաստանի Հանրապետությանը, փառք հայ ժողովրդին>>,- իր խոսքում նշեց Արմավիրի թեմի առաջնորդը:
Այսօր Հայոց ցեղասպանության 100-րդ տարելիցի հիշատակման և ոգեկոչման արարողություններ են տեղի ունեցել նաև մարզի մյուս երկու քաղաքային և մեծ թվով գյուղական համայնքներում:
Հավելենք, որ ՀՀ Արմավիրի մարզպետ Աշոտ Ղահրամանյանի հրավերով Հայոց ցեղասպանության 100-րդ տարելիցի պաշտոնական միջոցառումներին մասնակցելու նպատակով Հայաստանում են գտնվում Արմավիրի մարզի գործընկերներ Սլովակիայի Հանրապետության Տռնավայի նահանգի և Դանիայի Թագավորություն Օդերի համայնքի պատվիրակությունները, որոնք մարզպետի ուղեկցությամբ այսօր այցելել են Ծիծեռնակաբերդ, ծաղկեպսակ դրել հուշակոթողին և ծաղիկներ խոնարհել անմար կրակի մոտ:
