Տեղեկատվական կենտրոն
Նորություններ
Մարզպետի մասնակցությամբ պաշտոնապես բացվեց Արմավիրի թիվ 8 հիմնական դպրոցի նախակրթարանը
05.05.2015
ՀՀ Արմավիրի մարզպետ Աշոտ Ղահրամանյանն այսօր մասնակցեց Արմավիրի թիվ 8 հիմնական դպրոցի նախակրթարանի բացմանը: Միջոցառմանը մասնակցում էին նաև Հայ Առաքելական Եկեղեցու Արմավիրի թեմի առաջնորդ Տեր Սիոն եպիսկոպոս Ադամյանը, մարզպետարանի կրթության, մշակույթի և սպորտի վարչության պետ Գայանե Սայադյանը, մեծ թվով մանկավարժներ և հյուրեր:
Նախակրթարանը բացվել է դպրոցի միջոցներով: Կրթօջախի տարածքից առանձնացվել է համապատասխան հարկաբաժին, որը հիմնանորոգվել է, կահավորվել, ապահովվել ուսումնական անհրաժեշտ պարագաներով:
Այժմ նախակրթարանում գործում է երեք խումբ, որոնցում ընդգրկված է նախադպրոցական տարիքի շուրջ 60 երեխա: Միջոցառման մասնակիցներին նախակրթարանի սաները դիմավորեցին մեծ ոգևորությամբ ու սիրով` ներկայացնելով իրենց սովորած պարերը, երգերն ու ոտանավորները:
Նախակրթարանում ներգրավված աշխատակիցներն ունեն մասնագիտական կրթություն, անցել են նաև համապատասխան նախապատրաստական դասընթացներ և հմտացել նախադպրոցական տարիքի երեխաների հետ աշխատելու գործում:
Նշենք, որ Արմավիրի մարզում գործում է 32 նախակրթարան, ուր հաճախում է ավելի քան 962 երեխա: