Արմավիրի մարզպետի աշխատակազմ

ՀՀ Արմավիրի մարզ կատարած աշխատանքային այցի ընթացքում ՀՀ գյուղատնտեսության նախարար Սերգո Կարապետյանը մարզպետ Աշոտ Ղահրամանյանի ուղեկցությամբ այցելեց Եղեգնուտ, Վարդանաշեն և Այգեշատ համայնքներ, ծանոթացավ  սպասվող բերքի ծավալներին և  բերքահավաքի ընթացքին:

Եղեգնուտ համայնքում նախարարը եղավ Սերյոժա Կարապետյանի գյուղացիական տնտեսությունում, որտեղ ֆերմերը 17 հեկտարի վրա սմբուկ և ձմերուկ է աճեցրել: Սերյոժա Կարապետյանը տեղեկացրեց, որ սմբուկի առաջին բերքն արդեն հավաքել է. ծավալներից ու որակից գոհ է, եղանակային պայմանները, ըստ ֆերմերի, բարենպաստ են, ոռոգումը կազմակերպվել է պատշաճ մակարդակով:

Վարդանաշեն համայնքում նախարարն այցելեց տեղի ջերմոցային տնտեսություններից մեկը, որտեղ այս տարի շուրջ 1000 քմ տարածքի վրա աճեցվել է լոլիկ, վարունգ և պղպեղ: Արտադրանքը հիմնականում իրացվում է տեղի շուկայում:

Այգեշատ համայնքում գյուղատնտեսության նախարարը ծանոթացավ կեռասի և ծիրանի բերքահավաքին: Գյուղացիական տնտեսություններն այստեղ ևս գոհունակություն հայտնեցին բերքի բարձր որակից և առատությունից: Նրանց խոսքով` պտղի ապրանքային տեսքը լավն է, ինչը թույլ է տալիս մեծածավալ արտահանումներ իրականացնել: 

«Արմավիրի մարզում այս տարի պտուղ-բանջարեղենի և հատկապես խաղողի բարձր բերք է սպասվում, գարնան գյուղատնտեսական աշխատանքներն իրականացվել են ինչպես հարկն է, տարին բարենպաստ է, և 2015 թվականի վերջում մենք բոլոր առումներով շատ լավ ցուցանիշներ ենք ակնկալում»,- իր խոսքում նշեց ՀՀ գյուղատնտեսության նախարարը:

Նախարարի խոսքով` այս տարի ամբողջ հանրապետությունում ընդհանուր առմամբ բարձր բերքատվություն է սպասվում, իրացման առումով խնդիրներ չկան, արդեն իսկ արտահանվել է շուրջ 600 տոննա ծիրան` 2014 թվականի ամբողջ տարվա 40 տոննայի դիմաց, շուրջ 800 տոննա կեռաս` 2014 թվականի 370 տոննայի դիմաց, 850 տոննա լոլիկ`անցած տարվա 220 տոննայի դիմաց և 2220 տոննա վարունգ`անցած տարվա 415 տոննայի դիմաց:

Նախարարը նաև հավելեց, որ մինչև տարվա վերջ արտահանումների ծավալները կտրուկ կավելանա: Այս տարի, ընդհանուր առմամբ, արտահանվել է շուրջ 24 600 տոննա պտուղ-բանջարեղեն, ինչը անցյալ տարվա համեմատությամբ շուրջ 1000 տոննայով ավելի է: Նախարարի հավաստմամբ` մթերումների հետ կապված խնդիրներ չեն լինի, մասսայական բերքահավաքից հետո վերամշակող ընկերությունները կսկսեն նաև մթերումների կազմակերպումը:

Մարզպետ Աշոտ Ղահրամանյանը համոզմունք հայտնեց, որ այս տարի մարզը պտղի, խաղողի բանջարեղենային կուլտուրաների լուրջ քանակություն կարտադրի. <<Եթե անցյալ տարի մենք կարողացանք ապահովել գյուղմթերքի արտադրության 14.5 տոկոս աճ, ապա այս տարի նախորդ տարվա համեմատ 20-22 տոկոս գյուղմթերքի արտադրանքի աճ կունենանք>>:

Անդրադառնալով վերջին երկու ամիսներին մարզում տեղացած կարկտահարությանը` մարզպետը նշեց, որ պետական բյուջեի պահուստային ֆոնդից 16 մլն դրամ է հատկացվել մարզում ևս չորս հակակարկտային կայան տեղադրելու նպատակով: Մարզպետ Աշոտ Ղահրամանյանի տեղեկացմամբ` ևս 9 հակակարկտային կայան էլ կտեղադրվի մոսկվաբնակ գործարար Ռուբեն Գրիգորյանի աջակցությամբ: Նրա խոսքով` կարկտահարությունից առավել տուժած Արգինա և Քարակերտ համայնքների գյուղացիական տնտեսություննները կօգտվեն պետության կողմից սուբսիդավորված վարկերից: