Արմավիրի մարզպետի աշխատակազմ

ՀՀ Արմավիրի մարզպետ Աշոտ Ղահրամանյանն այսօր հրավիրված տարեվերջյան ամփոփիչ մամլո ասուլիսի ընթացքում ներկայացրեց հաշվետու ժամանակահատվածում մարզում իրականացված հիմնական աշխատանքները, խոսեց նաև հիմնախնդիրների ու նախատեսվող ծրագրերի մասին:

Մարզպետն իր խոսքում նշեց, որ տարեսկզբին բնակլիմայական պայմանները բավականին ծանր իրավիճակ ստեղծեցին գյուղացիական տնտեսությունների համար, սակայն ոլորտի պատասխանատուների ջանքերով հնարավոր եղավ ոչ միայն հաղթահարել առկա խնդիրները, այլև 7 տոկոսով ավելացնել մշակովի հողատարածքներն ու գյուղմթերքի արտադրության շուրջ 13 տոկոս աճ գրանցել:

Մարզպետ Աշոտ Ղահրամանյանի խոսքով` առատ բերքի տարում Հանրապետության նախագահի և կառավարության աջակցությամբ հնարավոր եղավ արտադրված բանջարբոստանային կուլտուրաների և պտղի ամբողջ խմբաքանակը հանձնել վերամշակող կազմակերպություններին: Ըստ նրա` մթերումների ընդհանուր ծավալը 12 տոկոսով գերազանցել է նախորդ տարվա ցուցանիշը:

Անդրադառնալով քաղաքաշինության ոլորտին` մարզպետ Աշոտ Ղահրամանյանը մասնավորապես ընդգծեց, որ կառավարության պահուստային ֆոնդից մարզի հրատապ խնդիրների լուծման 6-րդ ծրագրի շրջանակում հատկացվել է 605.0 մլն դրամ, որի արդյունքում վերանորոգվել է 16 դպրոց, 9 մանկապարտեզ, Մայիսյան համայնքի հրդեհված բնակելի շենքի 4 և Լենուղի համայնքի թիվ 2 վթարային բազմաբնակարան բնակելի շենքի 8 ընտանիքի բնակարանային ապահովման նպատակով տրամադրվել է պետական աջակցություն, վերանորոգվել են երեք քաղաքային համայնքների բազմաբնակարան բնակելի շենքերի տանիքներ, գազաֆիկացվել են երեք համայնքներ, իրականացվել են նաև մի շարք այլ ծրագրեր:

Խոսելով ճանապարհաշինության ոլորտում իրականացված աշխատանքների մասին` մարզպետը նշեց, որ հաշվետու տարում Համաշխարհային բանկի ֆինանսավորմամբ 2.0 մլրդ դրամ ընդհանուր գումարով հիմնանորոգվում են 18.8 կմ երկարությամբ՝ Տ-3-50 (Արմավիր-Մրգաշատ-Արևիկ-Երասխահուն) ավտոճանապարհը (նորոգման աշխատանքները ընթացքի մեջ են) և 623.0 մլն դրամ ընդհանուր գումարով 3.7կմ ընդհանուր երկարությամբ՝ Մ-9 (Թալին-Քարակերտ-Թուրքիայի սահման) միջպե¬տական ճանապարհի Քարակերտի հատվածը:

Նա տեղեկացրեց, որ 2015 թվականին ՀՀ պետական բյուջեի միջոցների հաշվին մարզային նշանակության ավտոճանապարհների ձմեռային պահպանման, ընթացիկ պահպանման և շահագործման համար հատկացվել է 37.4 մլն դրամ: Իսկ մարզի միջպետական և հանրապետական նշանակության 205.2կմ ձմեռային և 205.2կմ ամառային ավտո¬¬ճանապարհների համար ընթացիկ ամառային, ձմեռային պահպանման և սպա¬սարկման նպատակով հատկացվել է 331.3մլն. դրամ:

Ընդհանուր առմամբ՝ 2015 թվականին ունեցած տվյալների համաձայն, մարզում ճանապարհաշինության բնագավառում ներդրումների ծավալը կազմել  է 2,660.4 մլն դրամ: 2015 թվականին մարզում ճանապարհաշինության ոլորտում իրկանացվող աշխատանքների ուղղու¬թյամբ ներդրումների աճը 2014 թվականի համեմատությամբ եղել է 305 տոկոս:

Մարզպետն անդրադարձավ նաև առողջապահության ոլորտին` մասնավորապես նշելով, որ վարկային ծրագրերով Արմավիրի մարզի ամբուլատոր պոլիկլինի¬կական օղակում կատարվել է շուրջ 1 մլրդ. 141 մլն դրամի ներդրում, ինչպես նաև մեկնարկել է Արմավիրի բժշկական կենտրոնի ինֆեկցիոն բաժանմունքի տանիքի վերանորոգումը, որի համար պետական բյուջեով տրամադրվել է 35.0 մլն դրամ:

Մարզպետ Աշոտ Ղահրամանյանի խոսքով` ոլորտում անելիքները բազմաթիվ են, սակայն առաջնային է համարվում Էջմիածնի հիվանդանոցի և ծննդատան վերանորոգումը, որի մասին զեկուցվել է նաև Հանրապետության նախագահին, ում անմիջական հանձնարարությամբ Առողջապահության նախարարության հետ համատեղ քննարկվել են հարցի լուծման հնարավոր ուղիները:

Մարզպետը խոսեց նաև արտաքին կապերի և մարզում նախատեսվող ներդրումային ծրագրերի մասին` նշելով, որ այս առումով բավականին աշխատանքներ են տարվել: Նա առանձնացրեց Վենեցիա և Վոլոգոդա նահանգների հետ սկսած համագործակցությունը, որն ընդլայնելու մեծ հեռանկարներ կան:

Մարզպետը ներկայացրեց նաև Չեխիայաի Հանրապետության Մորավսկո-Սիլեզսկի երկրամասի հետ ունեցած համագործակցության արդյունքները, խոսեց աղբի վերամշակման գործարանի կառուցման մասին` ընդգծելով, որ 2016 թվականին այն չեխական կողմի հետ համատեղ կյանքի կկոչվի:

Մարզպետ Աշոտ Ղահրամանյանը տեղեկություններ ներկայացրեց նաև կրթության, մշակույթի և սպորտի բնագավառների  վերաբերյալ, խոսեց նշված ոլորտներում ունեցած հաջողությունների և նախատեսվող ծրագրերի մասին:
Նա պատասխանեց նաև լրագրողներին հետաքրքրող բազում հարցերի` կարևորելով նրանց գործունեությունը հասարակության կյանքում: