Տեղեկատվական կենտրոն
Նորություններ
Տեղի ունեցավ ՀՀ ՏԿԱԻ նախարարության փրկարար ծառայության Արմավիրի մարզային փրկարարական վարչության 2015թ. գործունեության ամփոփման հաշվետու նիստը
14.01.2016
Այսօր ՀՀ Արմավիրի մարզպետարանում տեղի ունեցավ տարածքային կառավարման և արտակարգ իրավիճակների (ՏԿԱԻ) նախարարության փրկարար ծառայության (ՓԾ) Արմավիրի մարզային փրկարարական վարչության (ՄՓՎ) 2015թ. գործունեության ամփոփման հաշվետու նիստը, որը վարում էր մարզպետ Աշոտ Ղահրամանյանը:
Նիստին մասնակցում էին ՀՀ ՏԿԱԻՆ ՓԾ տնօրենի տեղակալ, փ/ծ գեներալ-մայոր Վրեժ Գաբրիելյանը, ՀՀ ՏԿԱԻՆ աշխատակազմի ղեկավար Համլետ Հակոբյանը, ՏԿԱԻ նախարարության ՓԾ Արմավիրի ՄՓՎ պետ, փ/ծ գնդապետ Արմեն Ամիրջանյանը, ոլորտի մեծ թվով պատասխանատուներ և համայնքապետեր:
Հիմնական զեկույցով հանդես եկավ ՏԿԱԻ նախարարության ՓԾ Արմավիրի ՄՓՎ պետ, փ/ծ գնդապետ Արմեն Ամիրջանյանը` մասնավորապես ընդգծելով, որ իր ղեկվարած կառույցի գործունեությունը հաշվետու ժամանակահատվածում հիմնականում ուղղված է եղել քաղաքացիական պաշտպանության համակարգի կատարելագործմանը և արտակարգ իրավիճակներում բնակչության պաշտպանության խնդիրների իրականացմանը:
Ըստ զեկուցողի` Արմավիրի ՄՓՎ 2015թ. հիմնական միջոցառումների պլանով նախատեսված միջոցառումները կատարվել են ամբողջությամբ:
Ա. Ամիրջանյանի խոսքով` 2015թ. ընթացքում մարզում 2014թ. համեմատությամբ գրանցված տեխնածին արտակարգ դեպքերի քանակը աճել է 81-ով: Նշվեց, որ հաշվետու տարում ՄՓՎ ստորաբաժանումներն արձագանքել են հրդեհի 308, ճանապարհատրանսպորտային պատահարների 44, թունավորումների 302, պայթյունի 1, դիակի դուրս բերման 3, ականի հայտնաբերման 4 դեպքերի, ինչպես նաև 512 կենցաղային և այլ դեպքերի:
Նրա տեղեկացմամբ` հաշվետու ժամանակահատվածում մարզի բնակչության պաշտպանության համակարգի օպերատիվ նախապատրաստման ուղղությամբ պլանավորվել և անցկացվել են շտաբային ուսումնավարժություններ և օբյեկտային վարժանքներ, որոնք ընդգրկել են ինչպես քաղաքացիական պաշտպանության և բնակչության պաշտպանության ոլորտների հիմնահարցերը, այնպես էլ մարզի բնակչության պաշտպանության համակարգի օպերատիվ պատրաստականության ապահովման խնդիրները:
Միաժամանակ տեղեկացվեց, որ 2015թ-ի ընթացքում քաղաքացիական պաշտպանության համակարգի կատարելագործման նպատակով ՄՓՎ կողմից ցուցաբերվել է մեթոդական օգնություն մարզի համայնքների, կազմակերպությունների քաղաքացիական պաշտպանության պլանների և պլան-ժամանակացույցերի ճշգրտման ուղղությամբ:
Ա. Ամիրջանյանն իր զեկույցում անդրադարձավ նաև փրկարարական ուժերի պատրաստականության բարձրացման, անձնակազմի կառավարման և իրավական ապահովման ուղղությամբ իրականացված աշխատանքներին:
Ամփոփելով զեկույցը` նա առաջարկեց 2015-ին վարչության գործնեությունը նպատակաուղղել արտակարգ իրավիճակներում բնակչության պաշտպանության և քաղաքացիական պաշտպանության բնագավառներում մարզի վարչական տարածքում գործող հիմնարկ-ձեռնարկությունների և տեղական ինքնակառավարման մարմինների գործնեության բարելավմանը, ղեկավար կազմի և ՔՊ մասնագետների պատրաստվածության բարձրացմանը:
Ամփոփ հաշվետվություններով հանդես եկան նաև ՀՀ ՏԿԱԻՆ Արմավիրի մարզային հրդեհային և տեխնիկական անվտանգության տեսչության և ՏԱՏ տեխնիկական բաժանմունքի պետերը, «Հիդրոօդերևութաբանության և մոնիտորինգի պետական ծառայություն» ՊՈԱԿ-ի, ինչպես նաև «Մթնոլորտային երևույթների վրա ակտիվ ներգործության ծառայություն» և «Սեյսմիկ պաշտպանության արևմտյան ծառայություն» ՊՈԱԿ-ների Արմավիրի մասնաճյուղերի տնօրենները:
Նիստն ամփոփեց մարզպետ Աշոտ Ղահրամանյանը՝ ասելով. «Բոլորս շատ լավ հասկանում և պատկերացնում ենք, որ փրկարար ծառայության գործունեությունը կարևոր է մեր երկրի, մեր մարզի, յուրաքանչյուր համայնքի համար: Որքան մենք պատրաստված լինենք, այքան քիչ կլինեն մեր կորուստները արտակարգ իրավիճակներում»:
2015 թվականի Արմավիրի մարզի փրկարար ծառայության աշխատանքները մարզպետը գնահատեց ավելի քան բավարար և նշեց, որ այս տարի ավելի համախմբված պետք է աշխատել` բոլոր դժվարությունները պատվով հաղթահարելու համար. <<Բոլորս էլ գիտենք մեր հնարավորությունների սահմանը, ուղղակի մենք պետք է կարողանանք միասնական ուժերով և ունեցած միջոցներն արդյունավետ օգտագործելով անել հանարվորը, որպեսզի պատվով հաղթահարենք մեր առջև ծառացած խնդիրները>>:
Այնուհետև ծառայության ընթացքում ցուցաբերած մասնագիտական ունակությունների, ակտիվ կազմակերպչական գործունեության, անբասիր ու բարեխիղճ ծառայության համար մարզպետ Աշոտ Ղահրամանյանի կողմից պարգևատրվեցին Արմավիրի ՄՓՎ Վաղարշապատի ՀՓՋ հրամանատար, փ/ծ մայոր Հարություն Մխիթարյանը, Արմավիրի ՄՓՎ ՃԿԿ ավագ հրահանգիչ, փ/ծ կապիտան Գառնիկ Ղուկասյանը, Արմավիրի ՄՓՎ ՀՓՋխմբի պետ, փ/ծ լեյտենանտ Վանուշ Թումոյանը:
ՀՀ Արմավիրի մարզի Արմավիրի տարածաշրջանի հանրապետական և համայնքային նշանակության ճանապարհները ձյան առատ շերտից մաքրելու և տրանսպորտային միջոցների անվտանգ երթևեկությունն ապահովելու գործում ցուցաբերած ակտիվ գործունեության համար մարզպետ Աշոտ Ղահրամանյանի կողմից պարգևատրվեց նաև Արմավիրի «Ճանշինվարպետ» ՓԲԸ տնօրեն Արամայիս Դավթյանը: