Արմավիրի մարզպետի աշխատակազմ

ՀՀ Արմավիրի մարզպետ Աշոտ Ղահրամանյանի մոտ այսօր հրավիրված խորհրդակցությանը քննարկվեցին մարզում բուսական մնացորդներից բիովառելիք ստանալու հնարավորությունները:

Խորհրդակցությանը մասնակցում էին «Բարվա» ինովացիոն հետազոտական կենտրոնի տնօրեն, «Բիոզանգվածային էներգիա» նախագծի հեղինակ Արամ Վարդանյանը, մարզպետարանի աշխատակազմի տեղական ինքնակառավարման և հանրապետտական գործադիր մարմինների հարցերվ վարչության պետ Արսեն Ղուկասյանը, գյուղատնտեսության և բնապահպանության վարչության պետ Արթուր Այվազյանը և մեծ թվով համայնքապետեր:

Ներկայացնելով բուսական մնացորդներից բիովառելիք ստանալու հնարավորությունները` մարզպետ Աշոտ Ղահրամանյանը նշեց, որ բուսական ծագման ցանկացած բիոզանգված, այդ թվում` եղեգ, տերև, խոտ, մշակաբույսերի բուսական մնացորդներ, ծառերի ճյուղեր, մոլախոտային բուսականություն, փոքր-ինչ չորացնելուց հետո և հատուկ բրեկետավորման սարքի միջոցով սեղմվելու արդյունքում դառնում է փայտից ավելի մեծ խտություն ունեցող վառելանյութ, որի այրման ժամանակ անջատվող ջերմությունը հավասար է քարածուխին, էկոլոգիապես ավելի մաքուր է և այրումից հետո մնացորդները կարելի է օգտագործել որպես օրգանական պարարտանյութ:

Մարզպետն առաջարկեց համայնքապետերին բուսական թափոններից պինդ վառելիքային պելետների արտադրության կազմակերպման գործըևթացի վերաբերյալ մանրամասները հասանելի դարձնել գյուղացիների շրջանում և կազմակերպել բուսական մնացորդների խմբավորման և մշակության հանձնելու գործընթացը, որը գյուղացուն կբերի հավելյալ ֆինանսական միջոցներ և հնարավորություն կտա հոգալու ընթացիկ խնդիրները:

«Բարվա» ինովացիոն հետազոտական կենտրոնի տնօրեն, «Բիոզանգվածային էներգիա» նախագծի հեղինակ Արամ Վարդանյանն իր խոսքում նշեց, որ բիոզանգվածից ստացվող էկոլոգիապես մաքուր գազը կարող է հոգալ բոլորր էներգետիկ կարիքները` անհամեմատ մատչելի գներով: Ըստ նրա` 1 կգ պելետի այրման արդյունքում ստացվում է 5 ԿՎտ.ժ ջերմային էներգիա, որը 2-3 անգամ մատչելի է էներգիայի այլ աղբյուրներից:

Նա տեղեկացրեց, որ ընկերության կողմից ստեղծվել են բիոհումքի մշակման անհրաժեշտ սարքավորումները, որոնք հասանելի են բոլոր ցանկացողներին` տեղում արտադրություն կզմկերլինելու համար: Արամ Վարդանյանը նշեց, որ ընկերությունը համապատասխան գումարով պատրաստ է գյուղացուց գնելու անսահմանափակ քանակությամբ բուսական մնացորդներ` վառելիքային պելետների արտադրության կազմակերպման նպատակով:

Համայնքապետերն էլ իրենց հերթին պատրաստակամություն հայտնեցին աջակցելու և մասնակցություն ունենալու նախագծի իրագործմանը: